05 мая 2008 г.
Çуркуннехи каникул кунĕсенче, мартăн 28 — апрелĕн 2-мĕшĕсенче, Мускавра Пĕтĕм Раççейри XXXV “Космос” конкурс иртнĕ. Ăна Пĕтĕм Раççейри аэрокосмосăн “Союз” обществи йĕркеленĕ. Унта Трак чăваш-нимĕç гимназийĕн 11-мĕш класĕнче вĕренекен Антон Ермаков хутшăннă. Вăл тăван республикăра А. Г. Николаев космоса вĕçнĕренпе — 45, пĕрремĕш космос спутникне вĕçтерсе янăранпа 50 çул çитнине халалланă тупăшура çĕнтернĕччĕ. А. Ермаковăн наука ертÿçи аслă категориллĕ физика учителĕ В. П. Спасова.
Конкурса Раççейĕн 26 регионĕнчи делегацисем, çав шутра Мускав, Санкт-Петербург, Дон çинчи Ростов, Нальчик, Омск, Ставрополь, Çĕнĕ Шупашкар хулисенчен вĕренекенсем хутшăннă.
Вĕренекенсене питĕ ăшшăн йышăннă, “Бугорок” кану çуртне пурăнма вырнаçтарнă. Ачасем секцисем тăрăх хăйсен ĕçĕсене хÿтĕленĕ. А. Ермаков “Земное эхо солнечных бурь в Красноармейском районе ЧР” ятлă наукăпа тĕпчев ĕçĕпе тухса калаçнă. Антонăн ĕçĕн тĕп тĕллевĕ — “пĕчĕк тăван çĕр-шывĕнче хĕвелпе çĕр çыхăнăвне тĕпчесе пĕлесси”. А. Ермаков хĕвел çинчи взрывсем (сирпĕнсе кайнисене), 2005 çулхи аномали пулăмĕсем çынсен сывлăхне, выльăх-чĕрлĕх продуктивлăхне, районта тыр-пул тухăçне мĕнле витĕм кÿнине тĕпчесе пĕлнĕ. Хĕвел çинче сирпĕнсе кайнисем Çĕрĕн атмосферипе биосферинче палăраççĕ.
Комисси А. Ермаков ĕçне пысăка хурса хакланă. Ăна “Космос” конкурс дипломĕпе чысланă, Совет Союзĕн Геройĕ А. Серебров летчик-космонавт алă пуснă свидетельствăна панă.
А. Ермаков Мускавра çĕнĕ тус-юлташсем тупнă. Мускаври авиаци институчĕн ученăйĕсемпе курнăçни мĕне тăрать. Çĕр-шывăн тĕп хулинчи тĕл пулусем чылайччен асра юлĕç.