05 мая 2008 г.
Малтан акнă лаптăксенче çуртрисем симĕс кавир пекех курăнаççĕ. Чылайăшĕ тĕш тырăсене акассине вĕçлесе çĕр улми лартма кÿлĕнчĕ. Çав шутра тулли мар япаплă “Бахча” пĕрлешÿ те. Апрелĕн 28-мĕшĕнче кунта “иккĕмĕш çăкăр” лартма тухнă.
Эпир Чаканар ялĕ хыçĕнчи уйра иртнĕ ытлари кун пултăмăр. Ку пусăра тракторсен кĕрлевĕ тăратчĕ. Леонидпа Андрей (ашшĕпе ывăлĕ) Спиридоновсем доминаторпа çĕр улми лартма çĕр кăпкалатса хатĕрлетчĕç. Акă, вĕсем, анкарти хыçне çитсе, хăйсен агрегачĕсене чарчĕç те, трактор кабинисенчен тухса, домиинаторсене тĕрĕслеме пуçларĕç. Сăмах май, ку ĕç хатĕрĕсене “Бахча” пĕрлешÿ анчахрах туяннă.
— Тюк çипписем çакланса тулса хăшкăлтараççĕ. Тасатса пĕтерме май çук, — терĕ Спиридоновсенчен асли — Леонид. — Доминаторĕсене пĕр заводрах туса кăларнă. Шел, Андрейăн иккĕмĕш хут ванчĕ. Начар шăратса çыпăçтарнă. Çав ĕçе пурнăçланă çынтанах килет ĕнтĕ вăл. Пĕри типтерлĕ шăратса çыпăçтарнă, тепри вара — ячĕшĕн çеç. Каллех сварщик патне каймалла… Андрей ывăлăм кăçал пĕрремĕш çур аки ирттерет. Ĕнерччен вăл акма çĕр хатĕрленĕ, эпĕ — акнă…
Çĕр улми лартмалли агрегата районти, çулĕсене кура мар, чи пултаруллă та ĕçчен механизаторсенчен пĕри, пĕрре çеç мар “Çур аки” тата “Вырма” чемпионĕсен ятне тивĕçнĕ Олег Васильев ĕçлеттерет. Кассем çип çапнă евĕр тÿп-тÿрĕ. Чăн-чăн маçтăр ĕçлени куç кÿретех.
— Майăн 1-мĕшĕ тĕлне çĕр улми лартса пĕтересшĕн, — терĕ асăннă пĕрлешÿ ертÿçи Низам Мамедов. — Кăçал çĕр улми лаптăкне 30 гектара çитерме тĕллев лартнă. “Розара”, “Ред-Скарлет”, ”Удача” сортсем лартатпăр. Вăрлăхĕсем элитăллă. “Розарăна” Хусантан кÿрсе килнĕ…
Акă, Олег Юрьевич черетлĕ çаврăм туса тухрĕ те агрегата çавăрса лартрĕ. “Беларус 1025” трактор çĕнĕ, вăл — Л. Артемьев фермерăн çур аки умĕн туяннă тракторĕ-мĕн. Çĕр улми лартмалли хатĕрĕ вара — “Янмурзино” хуçалăхăн иккен. Вăл та çĕп-çĕнĕ, кăçал туяннăскер.
Кĕç грузчиксем картофелесажалка ещĕкĕсене çĕр улми вăрлăхĕ тултарма пуçларĕç…
— Ĕнер кăнтăрла иртсен лартма пуçларăмăр. Унччен Л. Артемьев хресчен-фермер хуçалăхĕнче 17 гектар лартса хăвартăм. Халĕ, авă, кунта… Унтан Янмурçинсене лартса памалла… — хăй тĕллевĕпе паллаштарчĕ Олег Юрьевич.
Грузчиксем копалка ещĕкĕсене çĕр улми вăрлăхĕ тултарнă вăхăтра вăл тавралăха сăнанă май, "çанталăкĕ парсан, тепĕр кун çурăран вĕçлемелле. Кунне 10 гектартан кая мар лартма пултаратпăр", — терĕ.
Çапла, “иккĕмĕш çăкăра” вăхăтра тата пахалăхлă варăнтарса хăварма çине тăрать О. Васильев. Çу кунĕсенче вăл çав лаптăксенчи çĕр улмие пăхса çитĕнтерессине хăй çине илнĕ. Ку тĕлĕшпе Олег Юрьевич сахал мар опыт пухнă ĕнтĕ. Мĕнех, пултаруллă çамрăк механизатора тĕллеве ăнăçлă пурнăçлама ырлăх-сывлăх сунар.
Голланди технологийĕпе “иккĕмĕш çăкăр” лартса çитĕнтермелли техникăна Германире туса кăлараççĕ. Асăннă машинăсене: çĕр улми лартмалли “GRIMMI GL 34T” тата хысаксем тумалли “GRIMMI GF 75-4не” ĕçе епле йĕркелештермеллине апрелĕн 30-мĕшĕнче “Бахча” пĕрлешÿре ку заводăн “Агротрейд” компанин Анат Чулхулари диллерĕн тĕп инженерĕ Сергей Арискин, проект-менеджерĕ Максим Пигалев тата агроном-технологĕ Евгений Мансуров паллаштарчĕç, чылай сĕнÿсем пачĕç.