05 мая 2008 г.
Çăва тухрăмăр. Çынсем халь харпăр хăй выльăх-чĕрлĕхне кĕтĕве е касăва хăвалаççĕ. Ялсенчи уйрăм çынсем харпăр хăй ĕнине е вăкăрне симĕс курăклă вырăнсене вĕренлеççĕ.
Шел пулин те, чылай чухне, хамăр тимсĕрлĕхе пула, шалчаран кăкарнă ĕне выльăх çухалнă тĕслĕхсем те тĕл пулаççĕ-ха. Çынсем харпăр хăй выльăх-чĕрлĕхне ялтан аякри çĕре е çырма-çатрана кăкарнипе çыхăннă ку. Çавăнпа усă кураççĕ ĕнтĕ вăрăсем.
Уявсем, паллах, тутлă апат-çимĕç хатĕрленипе пĕрлех, шашлăк, шÿрпе пĕçерессипе çыхăннă. Кукăр алăллă çынсем вара ямăттине куç хываççĕ, ялтан аякра çÿрекен е кăкарнă выльăх-чĕрлĕхе вăрлаççĕ. Çавăнпа та çынсен уйрăмах шалча çапса вĕренленĕ ĕнине е вăкăрне сыхлассипе тимлĕхе ÿстерни кирлех тесшĕн эпĕ. Тăруках выльăх-чĕрлĕх çухалсан тин çеç пирĕнтен пулăшу кĕтни çителĕклех мар пуль.
Килсенче сыхлавпа асăрханулăха ÿстернĕ çĕрте йытă усрани те усăллă пулĕ. Йытă çыншăн тус-юлташ теççĕ. Сире пулăшма яланах хатĕр тăтăр вăл.