05 мая 2008 г.
“Досаево” ял хуçалăх артелĕ кăçал та, ытти çулсенчи пекех, çурхи пĕрчĕллĕ тата пăрçа йышши культурăсене вăхăтра та пахалăхлă акса хăварчĕ. Куншăн, паллах, механизаторсен пысăк ушкăнĕ, кунпа пĕрлех сеяльщиксемпе грузчиксем, тав сăмахĕсене тивĕç. Пĕр ĕне пĕтĕм кĕтĕве варалать, теççĕ. Кун пеккисем, шел пулин те, çынсем хушшинче те тупăнаççĕ. Акă, илер, сăмахран, Тусайри Владислав Козловах. “Досаево” артель ертÿçи Л. М. Архипов каланă тăрăх, çак çамрăк çур акинче те хăйне ĕçре ытлах кăтартайман. Усаллипе вара палăрма ĕлкĕрнĕ, эрех-сăрапа туслашнă. Апрелĕн 28-мĕшĕнче ăна уя катоклама яма наряд пама тăнă. Вăл вара, пичĕ-куçĕсене çĕмĕрсе пĕтернĕскер, ир-ирех лачкам ÿсĕр вырăн çинче хуп туртнă. Пĕр хушă тĕлĕрсе тăна кĕрсен, хайхискер “Беларуçпа” катаччи чупма е “калым” тума кайма тухнă, кăшт кăна шырлана сикмен. Çитменнине çав кун çеç йĕркене кĕртнĕ ял хапхине, вăл тимĕртен, дисклă сÿрепе çаклатса хытах çĕмĕрнĕ. Асăннă “паттăрла” ĕçшĕн патшалăх технадзорĕн районти инспекцийĕ В. Козлова штраф парса явап тыттарма протокол çырчĕ. Виçĕ çул каялла кăна техникăпа çÿреме пуçланăскере çамрăклах эрех-сăрапа çывăхланни, паллах, ырри патне илсе çитермĕ. Кун пирки кашниннех асра тытмалла.