05 мая 2008 г.
Липовка ялĕпе юнашар çĕнĕ урамсем ÿсе-ÿсе ларчĕç. Вĕсенче кашни çулах 3—4 çурт çĕкленет. Çынсем татах лайăхрах пурăнасшăн. Çавăнпа та пÿрт-çуртри пÿлĕмсене те пăхса ăмсанмалла ăсталаççĕ. Каяш-шĕвеке те урамра вырнаçтарнă колодецсене (çăлсене) юхса тухмалла вырнаçтараççĕ. Хăшĕ-пĕри пÿлĕмсене путвала тунă. Анчах та асăннă условисемпе туллин усă курма май çук. Мĕншĕн тесен çулленех путвалсене çурхи шыв тулать.
Кăçал акă çĕр шайĕнчен 70—80 сантиметр шыв илчĕ. Çакă, паллах, улма-купăстана упрама чăрмантарать.
Çурхи шыв (грунтовые воды) Липовка çырминчен хăпараймасть. Чапаев ячĕллĕ урам çумĕнчи çырмаран та улăхаймасть. Апла пулсан çурхи шыв вăрман енчен çеç юхса анма пултарать. Çак инкекрен çăлăнма пулать тесшĕн эпĕ. Ман шутпа хурăн вăрма-нĕн çÿл енчен пуçласа пĕрлешÿллĕ “Анис” садран хăпаракан çырма пуçне шыв сăрхăнса тăма 650 метр чухлĕ дренаж хурсан аван пулмалла. Паллах, ку паян-ыран тумалли ĕç мар. Çапах та район администрацийĕн строительствăпа коммуналлă хуçалăх секторĕнче ĕçлекенсем пире пулăшасса шанас килет. Асăннă дренаж системине хывсан Чапаев урамĕнчи сакай-нÿхрепсене те çурхи шыв кĕме пăрахĕ.