05 мая 2008 г.
Районти халăх пултарулăх çуртĕнче çав каç — апрель уйăхĕнче, халăх йышлă пулнă. Красноармейскинчи ача-пăча искусствин шкулĕн кăçалхи отчетлă концертне пăхма пухăннă çынсем.
Юрă-ташă ăстисем сехет ытла хăйсен пултарулăхне кăтартнă. Акă, 5 çулхи Даша Петрова тăмрапа “Как под горкой” тата “Во саду ли в огороде” вырăс халăх юррисене вылянă. Даша Константинова, Маша Козлова, Ярослава Павлова, Анна Николаева, Катя Клементьева фортепианăпа пысăк ăсталăхпа савăнтарнă.
Куракансем гитарăпа вылянă Максим Архипов, тăмрапа — Кристина Козлова, балалайкăпа вылянă Алексей Андреев пултарулăхне ăмсанса пăхнă. Александрапа Дмитрий Соколовсем иккĕшĕ балалайкăпа питĕ ăста вылянă.
РФ тата ЧР тава тивĕçлĕ артисчĕн, хамăр ентешĕн, Кĕçĕн Шетмĕре çуралнă Виталий Петров ячĕллĕ районти конкурсăн çамрăк вокалисчĕсем Кристина Семенова, Татьяна Николаева, Елена Николаева, Надежда Яковлева, Алина Степанова, Елена Павлова хальхинче те хăйсен çепĕç юррисемпе куракансене тыткăнланă.
Кĕçĕн ушкăнри хореографи ушкăнĕ (ташă лартаканĕ Алина Козлова) кăтартнă тата халăх инструменчĕсемпе вылянă (ертÿçи Ирина Михайлова), вăтам тата аслă ушкăнри хореографсем ташланă “Испани ташши” кашнин кăмăлне тивĕçтернĕ.
Районти халăх пултарулăх çуртĕнче Красноармейскинчи ача-пăча искусствин шкулĕнче вĕренекенсем хăйсен пултарулăхĕпе паллаштарнă чухнех, фойере çамрăк ÿнерçĕсен выставки ĕçленĕ. Унта Н. Андреева, М. Яковлева, С. Алексеев вĕрентекенсен ушкăнĕсенчи çамрăк художниксен ÿкерчĕкĕсем пулнă.
Выставкăна чăваш халăхне çутта кăлараканĕ Иван Яковлев çуралнăранпа 160 тата К. Иванов “Нарспи” поэмăна çырнăранпа 100 çул çитнине халалланă.