29 апреля 2008 г.
Янкас ялĕнче пурăнакан Марина Владимировнапа Григорий Кириллович Кирилловсем кăçалхи Кăчкă праçник кунĕнче, ака уйăхĕн 20-мĕшĕнче, çемье çавăрнăранпа 60 çул çитнине — бриллиант туя — кĕтсе илчĕç.
Шăпа вĕсене мĕн ĕмĕрлĕхех пĕрлештернĕ. Яш чухнехи евĕрех, паян та пĕр-пĕрин çине юратса ăшă кăмăлпа пăхаççĕ. Пурнăç çулĕ пĕр мар пулсан та, Кирилловсене пĕр ăру çынни пулни, Тăван çĕр-шыва чун-чĕререн юратни, унпа мăнаçланни пĕрлештерсе тăрать. Юбилярсем çинчен каланă май, вĕсем суйласа илнĕ профессине таса чунпа парăннине те палăртасах килет. Григорий Кириллович, ав, хăйĕн пĕтĕм пурнăçне фельдшер ĕçне халалланă, Марина Владимировна вара нумай çул çамрăк ăрăва вĕрентнĕ. Тухăçлă ĕçшĕн мăшăра “Ĕç ветеранĕ” ят панă, медальсемпе, грамотăсемпе чысланă. Унсăр пуçне Григорий Кирилловичăн III степень Мухтав орденĕ те пур. Килĕшÿпе татура çемье 5 ача çитĕнтернĕ, аслă пĕлÿ илме пулăшнă. Асли — Валерий — Ижевск хулинче пурăнать, инженер-конструктор. Надеждăпа Александр ашшĕ çулне суйласа илнĕ, сывлăха сыхлас ĕç тытăмĕнче вăй хураççĕ: хĕрĕ — Удмурт Республикинчи Глазов хулин больницин тĕп врачĕ, ывăлĕ — ЧР Сывлăх тата социаллă аталану министерствин пай пуçлăхĕ. Тепĕр хĕрĕ — Елизавета — амăшĕн çулĕпе утăмлать, Красноармейскинчи 2-мĕш вăтам шкулти педагог. Кĕçĕнни — Екатерина — “Газпром трансгаз Чулхула” пĕрлешÿ филиалĕн хăрушсăрлăх техники енĕпе ĕçлекен инженерĕ. Кирилловсен ĕç династине ачисем çеç мар, мăнукĕсем те — вĕсем 11-ĕн — малалла тăсаççĕ. Мăнукĕсен 7 ачи те вĕсен пархатарлă çулĕпех утасса шанас килет.
Бриллиант туй ячĕпе Кирилловсене районти ЗАГС пайĕн пуçлăхĕ Е. Павлова (район пуçлăхĕн С. А. Николаевăн Тав çырăвне пачĕ), Красноармейски ял тăрăхĕн специалисчĕ Н. Прокопьева, “Единая Россия” партин Красноармейскинчи вырăнти уйрăмĕн ĕçтăвкомĕн ертÿçи З. Долгова ăшшăн саламларĕç, асăнмалăх парнесем пачĕç.