29 апреля 2008 г.
Райхаçат редакцийĕ Ĕç уявĕ ячĕпе “Ĕç паттăрĕсене аса илетпĕр” акци иртересси çинчен пĕлтернĕччĕ. Акă, Карай тăрăхĕнчен Николай КАРАЙ хăйĕн тĕрленчĕкне пирĕн пата çитерчĕ. Ăна паянхи номерте пичетлетпĕр.
Çурхи кун çулталăк тăрантарать, теççĕ. Ку “Караево” хуçалăха çитсессĕнех сисĕнчĕ. Сакăр сехет те çитмен — правлени çуртĕнче ирсерен иртекен производство канашлăвĕ вĕçленнĕ те.
— Платонов — района, Прохоров Çырмапуç уйне тухса кайрĕç, — терĕ насус поршенĕ йăтнă каччă.
Пĕрремĕш бригада бригадирне, Валерий Михайлович Малинина, урам хушшинче хăваласа çитрĕм.
Пирĕнтен культиватор çакнă трактор иртсе кайрĕ.
— Кăнтăрла иртсен, дисклă культиватор та тухать-ха, —хавхаланса калаçса пычĕ Валерий Михайлович. — Кăçал çурхи тырăсем 180 гектар акса хăваратпăр. Çĕр улми культурине те çĕнетесшĕн-ха. “Розара” сорт лартатпăр.
— Ĕçлекенсем нумайăн-и вара сирĕн?— ыйтрăм унран.
Вăл пăлханчăклăн куçран пăхса илчĕ те, ассăн сывласа:
— Вун пиллĕкĕн анчах çав,— терĕ. — Вун тăватă лаша. Ĕлĕкрех вăл…
Валерий Михайлович кун пек каласан, анчахрах пулнă пек туйăнакан яш вăхăт куç умне тухрĕ. Ун чухне уйра унта та кунта навус тĕмисем улăп тăприсем пек курăнса ларатчĕç. Вăтăр-хĕрĕх лав вĕсене кăткăсем пек сырса илетчĕ те тем хушăра сухаламалли анасем çине турттарса тăкатчĕ.
…Паян çĕр улми суйлама вуннăн кăна тухнă. Ĕçе тем пек васкатас килет Валерий Михайловичăн. Çавăнтах вăл, курткине хывса хурса, ирĕке тăкнă çĕр улмине ыттисемпе пĕрле суйлама тытăнчĕ.
1979 çулта хастар комсомолеца пĕрремĕш номерлĕ уй-хир бригадин бригадирне суйлаççĕ. Уй-хир тухăçлăхне çулсерен ÿстерессишĕн, колхозлă ял пуласлăхне лайăхлатассишĕн ырми-канми тăрăшать вĕри чунлă Валерий Михайлович Малинин бригадир. Çакна унăн кăкăрĕ çинчи виççĕмĕш степеньлĕ Ĕç Мухтавĕн орденĕ те лайăх çирĕплетет.