29 апреля 2008 г.
Кăçал ЧР Президенчĕн Указĕпе килĕшÿллĕн, республикăри мĕн пур ялсене хытă сийлĕ çулсемпе сыпăнтарассине вĕçлемелле. Пирĕн хаçат корреспонденчĕ çак кунсенче район администрацийĕн çул-йĕр ыйтăвĕсемпе ĕçлекен ертсе пыракан специалисчĕпе Ю. И. Ивановпа тĕл пулса калаçнă.
—Юрий Иванович, çăва тухрăмăр ĕнтĕ. Çавна май çул-йĕр тăвакансемшĕн хĕрÿ тапхăр пуçланчĕ темелле. Пирĕн районта ЧР Президенчĕн мĕн пур ялсене хытă сийлĕ çулсемпе çыхăнтарассине вĕçлес тĕлĕшпе кăларнă Указне пурнăçлассишĕн мĕнле тăрăшаççĕ, тархасшăн, каласа парсамăр?
— Чи малтанах çакна палăртса хăвармалла, асăннă Указа пурнăçласа, иртнĕ çул эпир 26 яла çулсем тăсрăмăр-çитертĕ-мĕр. Çав обăектсене пурне те вĕçне çитерме май килмерĕ, халĕ вĕсенче ку тĕлĕшпе малалла ĕçлеççĕ. Тĕслĕхрен, тулли мар яваплă “Дорстрой” пĕрлешÿ строителĕсем Хусакасси çулне хытă сийпе витме хатĕрлесе çитернĕ. Кун валли техникине те кÿрсе килнĕ. Асăннă подрядлă организаци Çырмапуç çулне те тăвать. Кунта та ăна хытă сийпе витмелле.
“Агротракт” пĕрлешÿ Ванюшкасси çулĕ çинчи ĕçсене маллалла тăсрĕ: çул-йĕр паллисене вырнаçтарать тата ытти те, çулсене хытă сийпе витме хатĕрлет.
“Чувашавтодор” пĕрлешÿн пĕр филиалĕ — Вăрнарти ДРСУ Уйриçуртпа Шăпăрлăвар ялĕсене çул тума хăйăрпа вак чул çителĕклех кÿрсе хунă. Халĕ вара кунти строительсем Красноармейски — Чатукасси çула (Кĕçĕн Шетмĕ ялĕнчен лерелле) хытă сийпе витме хатĕрлеççĕ: вак чул сараççĕ. Тепĕр эрнинче вара асфальт хума пуçласшăн.
Çÿлерех асăннă пĕрлешÿн тепĕр филиалĕ — Пăрачкаври ДРСУ Çеçмерпе Ыхракасси тата Ямайкасси çулĕсене хытă сийпе витме хатĕрлет, çул хĕррисене йĕркене кĕртет, çул-йĕр паллисене лартать тата ытти те.
“Полистромстрой” пĕрлешÿ Тватпÿртпе Типçырма çулĕсем çывăхĕнчи çĕрсене тĕксе тикĕслет, рекультиваци тăвать. Ку çула та хытă сийпе витмелле, вак чулне сарса тухнă.
“Воддорстрой” пĕрлешÿ Шывпуç тăвайккинчи çул çине хăйăр турттарать. Икĕ автогрейдерпа çул хĕррисене йĕркене кĕртсе пырать.
Кунти строительсем çул-йĕре пăхса тăрассипе те ĕçлеççĕ. Караялла тата Чатукассинелле тăсăлакан автоçулсем çинчи шăтăк-путăксене питĕрсе-сапласа тухса, Упинелле каякан çул çинчине йĕркене кĕртме тытăнчĕç.
Кăçал районĕпе, план тăрăх, 13 яла хытă сийлĕ çулпа çыхăнтармаллаччĕ. ЧР строительствăпа обществăлла инфраструктура министрĕ А. Гончаров республикăри 19 пĕчĕк яла (вĕсенче пурăнакан çынсен йышĕ 11 çынран та иртмест тесе) хытă сийлĕ çулпа çыхăнтармалли ялсен списокĕнчен кăларнă. Питĕ шел, çав шута пирĕн районти Кивьял та лекнĕ.
Мăн Шетмĕ — Упаçырма — Четрик — Кăлава автоçула тума “Транзит” пĕрлешÿ килĕшнĕччĕ. Шел, асăннă организаци ертÿçисемпе темиçе хут шăнкăравласан та хальлĕхе çыхăнма май килмерĕ-ха. Ĕç калăпăшĕ вара кунта пĕчĕк мар. Кунсăр пуçне Мăн Шетмĕпе Упаçырма ялĕсем хушшинчи çырмара питĕ пысăк пăрăх хывмалла.
Халĕ кунта Çĕмĕрлери кĕпер тăвакан отряд Упаçырмапа Четрик ялĕсем хушшинче кĕпер тăвать. Унăн свайĕсене хĕл кунĕсенчех çапса хăварнă. Ку обăекта план тăрăх октябрь вĕçĕнче ĕçе кĕртмелле. Çавăнпа та ыйту питĕ çивĕч тăрать.
Туканашпа Арçунакасси çулĕсен подрядчикĕ паянхи кун та тупăнман. Пĕрремĕшĕнче — 690, иккĕмĕшĕнче 426 метр çул сармалла. Кам кунта ĕçлеме килĕшĕ, хальлĕхе паллă мар.
— Юрий Иванович, Президент Указне кăçалах пурнăçлайăпăр-и хамăр районпа? “Транзит” пирки хальтерех А. Гончаров е Лепилин патне тухмалла мар-и. Унсăрăн кая юлатпăр пулĕ?
— Тĕрĕссипе вăхăтрах пурнăçламалла. Мĕн пур обăектсене, халь ĕçлекеннисене, укçа уйăрнă. Пĕлтĕр вара ку енĕпе йывăрлăхсем пулнăччĕ, укçине часах уйăрмарĕç. Халĕ куллен çине тăрса ĕçлени кирлĕ, вара пурте йĕркеллех пулĕ. ”Транзит” пирки вара министерствăсемпе калаçса пăхă-пăрах.
— Апла тăк çак ĕçе йĕркелесе тăрас çĕрте Сире ăнăçу сунатăп, Юрий Иванович!
— Тавтапуç ырă сăмахсемшĕн.