25 апреля 2008 г.
Ака уйăхĕн 18-мĕшĕнче халăх пултарулăхĕн районти çуртĕнче ветерансен районти канашĕн черетлĕ çиччĕмĕш пленумĕ иртрĕ. Унта ветерансен районти канашĕн членĕсемпе пĕрлех ветерансен вырăнсенчи канашĕсен председателĕсем, ял тăрăхĕсен пуçлăхĕсем, ветерансен ыйтăвĕсене тивĕçтерессипе çыхăннă предприяти-учрежденисен ертÿçисем хутшăнчĕç. Пленумра икĕ ыйту пăхса тухрĕç.
Пĕрремĕшĕпе — “Вăрманкас, Шупуç, Кивьял тата Туканаш ялĕсенчи ветерансен канашĕн ĕçĕ-хĕлĕ çинчен” унăн председателĕ Р. Д. Репин отчет туса пачĕ. Сăмах май, Радомир Дмитриевич ку лава 11-мĕш çул туртать. Канаш йышне унсăр пуçне Л. К. Исаевапа В. С. Гаврилов кĕреççĕ. Çÿлерех асăннă 4 ялта пенсионерсем 78-ăн, çав шутра вăрçа хутшăннисем — 2-ĕн (К. Ивановпа В. Леонтьев), тылра вăй хунисем — 31-ен, ĕç ветеранĕсем — 17-ĕн, вăрçă вут-хĕмĕнче пуç хунисен арăмĕсем — 2-ĕн. Вера Павлова, акă, кăçалхи сентябрьте çуралнăранпа 100 çул çитнине кĕтсе илме хатĕрленет. Халĕ вăл тăванĕ — Матрена Павловна патĕнче пурăнать. Çулĕсене кура мар вăр-вар. Пĕлтĕр, сăмахран, 7 касă çĕр улми кăларнă. Хĕл кунĕсенче вара çăм арланă.
“Пирĕн тăрăхра хуçалăх çук, çавăнпах хамăра шанса ĕçлетпĕр. Виталий Скачков, ав, 350 метр тăршшĕ шыв пăрăхĕ туянса, çавăн пекех укçа парса пулăшрĕ. Халăхран та укçа-тенкĕ пухрăмăр та шыв пăрăхне хутăмăр, шыв колонки вырнаçтартăмăр”, — пĕлтерчĕ пленумра Радомир Дмитриевич.
Ырă ĕçсем канашăн татах та нумай. Юбилейсене, ав, пĕрле палăртасси йăлара. В. Леонтьевпа Ф. Журавлеванне, акă, пĕрле пуçтарăнса уявланă. Пысăк пĕлтерĕшлĕ мероприятисене, пулас ăрусем валли хăварас тесе, видеокамерăпа ÿкереççĕ. Халăха явăçтарсах Тăван çĕр-шывăн Аслă вăрçинче пуç хунă ентешсене сума суса лартнă палăка юсанă, тавралла карта тытнă, “Вĕсем Тăван çĕр-шывшăн çапăçнă” стенд йĕркеленĕ. “Кай, кай Ивана” тата “Нарспи” спектакльсем хатĕрлесе видеокамерăпа ÿкернĕ. Вĕсенчи рольсене 87-ри Е. Дмитриева, 84-ри А. Ильина тата Н. Николаев (шел, кăçалхи çур кунне çĕре кĕнĕ вăл) маттур вылянă. Ватă çынсен кунне пĕрле пухăнса уявлаççĕ, çакна валли чăваш сăри вĕретсе хатĕрлеççĕ, шÿрпе пĕçереççĕ.
“Ялсем ватăлаççĕ, йыш сахалланать. Кивьялти 5 килте, ав, 7-ĕн çеç пурăнаççĕ. Çавăнпах район ертÿçисем пирĕн нуша-терте ăнланасса шанатпăр. Ватă çын чирлемесĕр пулмасть. Шупуçĕнче медпункт ĕçлемест. Пикшикре те врач офисĕ пулмасть”, — терĕç. Чатукассинчи офиса çитсе килме вара пирĕн ватăсемшĕн чĕр нуша”, — палăртрĕ ветерансен канашĕн председателĕ.
Сăмах май, вăл ку тăрăхра ирттерекен пур мероприяти пуçаруçи тесен те йăнăш пулас çук. Ял урамĕсемпе масар тасалăхĕшĕн те, вут-кăвар тухасран асăрханса каçхи хурал тăрассине йĕркелессишĕн те чунĕ вăркать Радомир Дмитриевичăн. Çырма-çатрара хăй 150 тĕп йăмра, çырла паракан йывăçсем лартса хăварнă. Ачасемпе çуллен тĕл пулу йĕркелет, вĕсене пылпа, пылак шывпа хăналать. Кăçал 70 çул тултарчĕ Р. Д. Репин. Çавна май тата культура тытăмĕнче нумай çул тухăçлă вăй хунăшăн, общество пурнăçне активлă хутшăннăшăн район администрацийĕн Хисеп грамотине тивĕçрĕ.
Пленум ытахальтен мар-тăр Шупуç тăрăхĕнчи ветерансен канашĕн паха опытне ырласа йышăну турĕ.
Пленумра Тăван çĕр-шывăн Аслă вăрçинче Çĕнтерÿ тунăранпа 63 çул çитнине тивĕçлипе кĕтсе илессипе ветерансен канашĕсен умĕнче тăракан задачăсем пирки социаллă хÿтлĕх пайĕн пуçлăхĕ Л. А. Киселев тухса каланине те итлерĕç.
Кун йĕркине кĕртнĕ ыйтусене сÿтсе явма Т. К. Александрова (Именкасси), З. А. Аркадьевапа М. П. Прохоров (Красноармейски), К. П. Петров (Янмурçин), Н. Г. Ершов (Янкас), Ф. Л. Лукин (Анат Кушар) тата районти аптека заведующийĕ З. Г. Овчинникова хутшăнчĕç, сĕнÿ-канашсем пачĕç.
Ветерансем çĕкленĕ ыйтусене пленумра район пуçлăхĕн социаллă ыйтусемпе ĕçлекен пĕрремĕш çумĕ Н. И. Антонов хуравларĕ.
Юлашкинчен пленумра пулнисем Раççей тата Чăваш халăх артисчĕн П. Заломнов профессорăн концертне пăхрĕç.