25 апреля 2008 г.
Ака уйăхĕн 23-мĕшĕнче район администрацийĕн çурчĕн ларусен залĕнче район депутачĕсен тăваттăмĕш суйлаври Пухăвĕн черетлĕ çирĕм иккĕмĕш ларăвĕ иртрĕ. Унта район депутачĕсен Пухăвĕн депутачĕсемсĕр пуçне ял тăрăхĕсен пуçлăхĕсем, район центрĕнчи предприятисемпе организацисен тата учрежденисен, хуçалăхсен ертÿçисем хутшăнчĕç.
Депутатсем çакăн пек кун йĕркине çирĕплетрĕç:
1. Район Уставне улшăнусем кĕртесси çинчен.
2. Районăн 2007 çулхи бюджетне пурнăçлани çинчен отчет.
3. Районăн 2008 çулхи пĕрремĕш кварталти бюджетне пурнăçлани çинчен.
4. Районăн 2020 çулчченхи экономикăпа социаллă пурнăç аталанăвĕн Стратегийĕ çинчен.
5. Красноармейски районĕнче 2008—2011 çулсенче пĕчĕк тата вăтам предпринимательлĕхе муниципалитет тĕлĕшĕнчен пулăшу кÿмелли программа çинчен.
6. Красноармейски район администрацийĕн пуçлăхĕн должноçне йышăнмалли конкурс ирттермелли йĕрке çинчен калакан положени.
7. Красноармейски районĕн муниципаллă службин должноçне йышăнмалли конкурс ирттермелли йĕрке çинчен калакан положени.
8. Красноармейски районĕн муниципаллă служащийĕсен Реестрне çырмалли йĕрке çинчен положени.
9. Район территорийĕнче тирпей-илем, санитари тĕлĕ-шĕнчен тасалăхпа йĕрке тумалли Правилăсене улшăнусем кĕртесси çинчен.
10. Красноармейски районĕн 2007— 2009 çулсенче преступлени тунипе кĕрешессине вăйлатмалли муниципаллă комплекслă программăна улшăнусем кĕртесси çинчен.
11. Красноармейски районĕн бюджет хутшăнăвĕсене йĕркелештересси çинчен положенине улшăнусем кĕртесси çинчен.
12. “2005—2010 çулсенче Красноармейски районĕнчи çамрăк çемьесене пурăнмалли çурт-йĕр ыйтăвĕсене татса пама пулăшасси” районти тĕллевлĕ программăна çĕнĕ редакципе çирĕплетесси çинчен.
13. “Красноармейски районĕнчи культура: 2008—2010 çулсем” районти тĕллевлĕ программăна çирĕплетесси çинчен.
14. Красноармейски районĕн территорийĕнче ыйтман çĕр пайĕсемпе усă курасси çинчен.
15. Районти ревизи комиссийĕн йышне Э. П. Шумилов депутата кĕртесси çинчен.
16. Красноармейски районĕнче 2008—2012 çулсенче пĕтĕм тĕнчери пахалăх стандартне хăвăрттăн пурнăçа кĕртмелли муниципаллă тĕллевлĕ программăна çирĕплетесси çинчен.
17. “Красноармейски районĕнчи вĕрентÿ: 2006—2010 çулсем” районти тĕллевлĕ программăна пурнăçласси мĕнле пыни çинчен.
18. Наградăсем пама тăратасси çинчен.
Кун йĕркине кĕртнĕ çак ыйтусемпе ларура район администрацийĕн юридически, вĕрентÿ, финанс тата экономика аталанăвĕн пайĕсен начальникĕсем Л. Артемьев, Н. Антонов, Р. Николаева, А. Михайлова, социаллă аталану, пурлăх тата çĕр хутшăнăвĕсен секторĕсен заведующийĕсем В. Лукинпа В. Николаев, строительство тата пурăнмалли çурт-йĕрпе коммуналлă хуçалăх секторĕн тĕп специалист-эксперчĕ В. Тарасова, район депутачĕсен Пухăвĕн председателĕ В. Александров, район администрацийĕн ĕçĕсен управляющийĕ С. Григорьев тухса каларĕç.
Лару сÿтсе явнă пур ыйтупа та ĕçлĕ йышăну турĕ. Чăн та, районăн 2020 çулчченхи экономикăпа социаллă пурнăç аталанăвĕн Стратегине пĕрремĕш вулавпа йышăнчĕç, вырăнсенчен ку енĕпе сĕнÿсем кĕтнине пĕлтерчĕç. Ун умĕн çак ыйтупа район пуçлăхĕ С. Николаев та хăйĕн шухăшне пĕлтерчĕ. “Ку документ проектне эпир иртнĕ çул та пăхса тухнăччĕ-ха. 2020 çулта республикăра юлашки вырăнта пулас мар тесен, паян малтисен йышĕнче пулмалла пирĕн. Хальлĕхе çитменлĕхсем тупăнсах тăраççĕ-ха. Акă, пĕлтĕр районта пурăнакан кашни çын пуçне эпир хамăр туса кăларнă промышленность продукцине пурĕ те 1745 тенкĕлĕх çеç тиесе ăсатнă. Ку хушăрах çак кăтарту çĕрпÿсен — 4204, муркашсен — 8591, етĕрнесен — 23 пин, вăрнарсен 54090 тенкĕпе танлашнă. Сывлăха сыхлас ĕçе илер-ха тата. Паян районти ялсенчи фельдшерпа акушер пункчĕсене лицензилесси, акă, йывăррăн пырать. Агропромышленность комплексĕнче те çитменлĕхсем пĕрин хыççăн тепри тупăнса пыраççĕ. Кашни çын пуçне илекен продукци хакĕ кÿршĕллĕ Муркаш районĕннинчен пĕчĕкрех. Чăрмав-çитменлĕхсенчен хăтăлма çĕнĕ çул-йĕр шырамалла çавăнпах”, — терĕ Станислав Андреевич. Вăл хăйĕн сăмахĕнче Трак ен халăхĕ йывăрлăхсенче çухалса каймасăр ĕçленине тата пурăннине, район тата ял тăрăхĕсен администрацийĕсенче ĕçлекенсемпе депутатсене шаннине тепĕр хут каларĕ, çав шанăçа тÿрре кăлармаллине палăртрĕ.
2008— 2010 çулсенче районти культура отраслĕ мĕнле пуласси пирки калакан тĕллевлĕ программăна çирĕплетес умĕн те депутатсен ыйтусем пулчĕç. Акă Еншик Чуллăри вăтам шкул директорĕ Т. Беззубова депутат ялти культура учрежденийĕ ĕçлеменнине каларĕ. Ку ыйтăва вăл ял старостисен конференцийĕнче те хускатнăччĕ-ха. “Унтанпах нимĕнле улшăну та пулмарĕ. Çамрăксем каçсерен малтан пилорама вырнаçнă çĕрте пуçтарăнма тытăнчĕç. Кăвайт та чĕртеççĕ”, — пĕлтерчĕ Татьяна Александровна. (Депутатсем критикăлла çак асăрхаттарăва кĕртнĕ протокола Еншик Чуллă ял тăрăхĕн пуçлăхĕ Г. Васильев патне çитерме йышăнчĕç). Пшонкă ялĕнчи Ю. Ильин депутат вара бюджетра пĕчĕк клубсене юсама та укçа-тенкĕ пăхса хăвармаллине палăртрĕ.
Ларăва ЧР Президенчĕн Администрацийĕн Йĕркелÿ ĕçĕн управленийĕн консультанчĕ Э. Краснов хутшăнчĕ.