25 апреля 2008 г.
Библиотекарьсен районти канашлăвĕнче пулчĕ ку. Тин çеç пичетрен тухнă кĕнекесене сутма тытăнчĕç. Библиотекарьсенчен тахăшĕ çавăнтах: “Эпĕ Николай Карай çырнисем пулсан, хаваспах туянатăп”, — терĕ.
Николай Карай — чăваш литературинче çитмĕлмĕш çулсенче палăрнă писатель. Ачасем валли те, çитĕннисем валли те сăвăсемпе калавсем çырать.
Николай Дмитриевич Красноармейски районĕнчи Карайра çуралса ÿснĕ. Хăй пурнăçĕнчи 27 çулне вăл çитĕнекен ăрăва вĕрентес ĕçе панă. Чăваш Республикинчи тата Томск облаçĕнчи шкулсенче вăй хунă.
Ентешĕмĕр ытларах ача-пăча валли çырать. Унăн ку тематикăпа “Шăллăм”, “Туссем”, “Ураллă купăс” кĕнекисем çапăнса тухнă.
Авторсен ушкăнĕпе пĕрле пичетлесе кăларнисенчен “Нарт-нарт кăвакал”, “Туссемпе пĕрле”, “Юратнă кĕнеке”, “Уйăх ачи” кĕнекесем пур.
2008 çулта Чăваш кĕнеке издательствинче кĕçĕн çулхи ачасене вулама “Эпĕ халĕ пиллĕкре” сăвăсен кĕнеки пичетленчĕ. Вăл 2000 экземпляр тиражпа çапăннă. Кĕнекере 26 сăвă. Ăна П. Сергеев художник илемлетнĕ.
Николай Карайăн сăввисемпе калавĕсене кĕçĕн классен шкул программине те кĕртнĕ.