18 апреля 2008 г.
Çын кăмăлĕпе хаклă. Унран пахараххи, çывăхраххи урăх çуках. Çав çынсен йышĕнчех пуль Александр Валерьевич Ефимов та. Районти шалти ĕçсен пайĕнчи çул-йĕр патруль службин инспекторĕ вăл. Кĕçĕн лейтенант.
Тулли сăн-питлĕ, кĕрнеклĕ хул-çурăмлă. Пули-пулмиех сăмахламасть. Çавах та ырă кăмăлĕ, чун ăшшийĕ хăйпе пĕрлех унăн.
— Александр, эсир Кушкă тăрăхĕнченччĕ вĕт? — тăруках сăмах хушрăм ăна.
— Кушкă ялĕнче çуралнă эпĕ. Ачалăхпа çамрăклăх Мăн Шетмĕ енпе çыхăннă, — хуравларĕ çамрăк.
Калаçăва малалла сыпăнтартăмăр. Мана ытларах Саша епле майпа-ха милици ĕçченĕн профессине килĕштерни кăсăклантарчĕ. Тата çак йышра ят-сум çĕнсе илнĕ-çке. Кашниех пултаруллă та тăрăшуллă пулнăшăн мухтать. Ахальтен мар-тăр милиционерăн сăн ÿкерчĕкĕ хисеп хăми çинче те вырăн тупнă.
— Пĕлетĕр-и эсир? Эпĕ ÿсĕрпе руль умне ларакансемпе çав тери çураçусăр. Тем те кĕтме пулать-çке вĕсенчен. Тен, çавăнпах та пуль ГАИ (унччен çапларах каланă) ĕçченĕ пулас терĕм. Кăштах та пуль йĕрке тăвас шухăш-кăмăл канăç паман ĕнтĕ мана. 1993 çулта района ĕçе вырнаçрăм, — хăй шухăшне пытармарĕ Александр Валерьевич. — Вăт çавăнтанпах вăй хуратăп.
Икĕ хĕрпе пĕр ывăл çитĕн-нĕ. Александр — вăталлăххи. Ашшĕ пирĕн хушăра çук ĕнтĕ.
А. Ефимов Çĕрпÿри ял хуçалăх техникумĕнче пĕлÿ пухнă. Çемьеллĕ. Мăшăрĕпе — Таньăпа — Аньăна çитĕнтереççĕ. Татуллă пурăнать çемье.
— Александр, пушă вăхăт сахалтарах пуль сирĕншĕн? — терĕм ăна.
— Чылай чухне çукрах, паллах. Пĕрехмай çул-йĕр çинче пулма тивет. Тепĕр чухне кил-çурт çинчен те манатăн çав. Çавах та район хаçатне юратса вулатăп. Эсир пирĕн ĕç-хĕлпе çыхăнтарнă материалсене тăтăшрах пичетлĕр-ха, — кăмăллăн калаçать инспектор.
— Сирĕн нимĕнле награда та çук-и?— тетĕп татах.
— Икĕ çул каялла мана “ГИБДД службинче палăр-нăшăн” 2-мĕш степеньлĕ знакпа (паллăпа) хавхалантарнăччĕ, — сывпуллашрĕ инспектор.