— Ирех пуçланă паян. Кăнтăрлахи апат тĕлне вунă гектар ытларах акрăм пулас, — терĕ “Гигант” хуçалăхри пултаруллă та ĕçчен механизаторсенчен пĕри, Владимир Николаев. Владимир Мокеевпа Александр Васильев сеяльщиксем сеялка ещĕкĕсене минераллă удобрени тата тулă тултарнă вăхăтра сăмахласа илтĕмĕр эпир унпа. Ĕçченсен кăмăлĕ лайăх. Хĕвеланăç енчен вĕрекен вичкĕн çилĕ çĕре хăвăрт типĕтет. Çавăнпа та хатĕрленĕ ку лаптăка хăвăртрах “шуратса” хăварассишĕн тимлеççĕ алманчсем. Вăрлăха имçамланă. Яков Афанасьев водитель вăрлăхпа тата минераллă удобренипе тивĕçтерсе тăрать. Ăна çакăнта икĕ Алина — Николаевапа Герасимова, Людмила Михайловапа Альбина Васильева, Галина Григорьевапа Валентина Герасимова грузчиксем пулăшса пыраççĕ. Çур акине хутшăнакансене пурне те медицина тĕрĕслевĕ витĕр кăларнă. Акара сăмах вакласа тăма вăхăт çук, лайăх тасатса имçамланă вăрлăха хăвăртрах кăпăшка çĕр çине варăнтарса хăвармалла. Çакна аван ăнланать В. Николаев механизатор. Кĕç ака агрегачĕ вырăнтан хускалчĕ те малалла пĕр тикĕссĕн шутарчĕ, ун хыççăн тусан йăсăрланса кăна пырать.