03 июня 2021 г.
Çĕртме уйăхĕн 1-мĕшĕ — Пĕтĕм тĕнчери ачасене хÿтĕлемелли кун. Ăна иртнĕ ĕмĕрĕн 50-мĕш çулĕсенче паллă тума тытăннă.
Çак куна уявлама Пĕтĕм тĕнчери хĕрарăмсен федерацийĕн 1949 çулхи чÿк уйăхĕнчи ятарлă сессийĕнче йышăннă. Пĕрлешнĕ нацисен организацийĕ /ООН/ ку сĕнĕве ырланă, вăл хăйĕн ĕçĕ-хĕлĕнче ачасен прависене хÿтĕлессине, вĕсен пурнăçĕпе сывлăхĕшĕн тăрăшассине тĕп ĕçсенчен пĕри тесе палăртнă.
1959 çулта ООН Ачасен прависен декларацине йышăннă, 1989 çулхи чÿк уйăхĕн 20-мĕшĕнче Ачасен прависем çинчен калакан конвенци кун çути курнă. Документа 61 патшалăх алă пуснă.
Кашни çĕршыврах халăхăн 20-25 проценчĕ — ачасем. Çулленех çак кун вĕсене валли тĕрлĕ мероприяти иртеççĕ.
Пĕтĕм тĕнчери ачасене сыхламалли кун районти культура çуртне райцентрти садиксене çÿрекенсем пухăннă. Культура тытăмĕнче ĕçлекенсем вĕсене «Как божья Коровка и Пчелка лето искали» юмах кăтартнă. Кĕçĕн çултисем «Передай Сердечко», «Найти цель», «Веди себя хорошо» вăйăсем вылянă, «Повтори за мной», «Пой вместе с нами», «Дружный хоровод» ташăсем ташланă. Вĕсене уяв ячĕпе пылак çимĕçсемпе хăналанă.
Пĕчĕккисене уяв ячĕпе район администарцийĕн пуçлăхĕ Александр Кузнецов тата район прокурорĕ Антон Бабаев саламланă, тĕрлĕ тĕслĕ хăмпăсем парнеленĕ.
Сергей САМСОНОВ.