25 марта 2021 г.
Кĕçĕн Шетмĕ ял тăрăхне кĕрекен Ванюшкассинче хĕле савăнăçлăн ăсатрĕç. Уява хресчен фермер хуçалăхĕн ертÿçи Александр Терентьев хăйĕн янаварĕпе тата та илем кÿчĕ.
Ял çыннисем Тĕл пулу çурчĕ умне пухăнчĕç. Александр Ильич купăсне тăсса ячĕ, кĕçех параппан сасси илтĕнсе кайрĕ. Уява килнĕ çынсем чăтса тăраймарĕç, ташша тухрĕç. Каярах Александр уява килнисене хыçлă çуна çине лартса ярăнтарчĕ. Иртнĕ çул общество ĕçĕн хастарĕ А. Терентьев тăрăшнипе ял уявне Шупашкар артисчĕсене те чĕнсе илнĕччĕ.
Пуш уйăхĕн 8-14-мĕшĕсенче кăшăл вирусĕ алхаснă тапхăрта чирлисене сипленĕ шурă халатлисене тав тумалли акци иртрĕ. Александр Терентьев янаварĕпе Çĕрпÿ районĕнчи Анатри Кипекçи ялĕнчи уява хутшăнчĕ, медицина ĕçченĕсене ăшшăн тав турĕ, лашапа ярăнтарчĕ. Пирĕн хушăра çавăн пек кăмăллă çынсем пулни пурнăçа ырăлăх кÿрет. С. САМСОНОВ.