25 марта 2021 г.
Иртнĕ канмалли кунсенче Карай ял тăрăхне кĕрекен Кÿлхĕрри ялĕнче пурăнакансем субботника пухăнчĕç.
Палăртнă кун ирхине 8 сехет валли ял çыннисем ĕç хатĕрĕсемпе тухрĕç. Вĕсем ял пуçĕнчи тата анатри пĕвене çурхи шыв-шур сиен кÿресрен канавсем чаврĕç, Тăван çĕршывăн Аслă вăрçинче пуç хунă паттăрсене асăнса лартнă стела таврашĕнчи территорие юртан тасатрĕç. Субботникра Елена Федорова, Раиса Потапова, Альбина Владимирова ĕç ветеранĕсем, ыттисем хастар пулчĕç.
Ял çыннисем çитес вăхăтра тепĕр хутчен субботника тухма калаçса татăлчĕç.
Галина ЕГОРОВА.