11 марта 2021 г.
Красноармейски район хаçачĕн пĕрремĕш номерĕ тухнăранпа иртнĕ шăматкун 86 çул çитрĕ.
Район хыпарçин биографийĕ Трак районĕпе пĕр çултах çырăнма пуçланă. Унăн пĕрремĕш номерĕ 1935 çулхи пуш уйăхĕн 6-мĕшĕнче «Колхозник» ятпа кун çути курнă. Вăл ун чухне Çĕрпÿ хулинчи типографире 1200 экземплярпа пичетленнĕ. Хаçат пĕчĕк форматлă пулнă. Пĕрремĕш номере Иванов яваплă редактор алă пусса кăларнă.
Хаçат страницисенче район историйĕ çырăннă тесен те йăнăш мар пулĕ. 1938 çулхи çĕртмен 25-мĕшĕнчен райхаçат çĕнĕ «Коммунизм çулĕпе» ятпа тухма пуçланă. 1966 çулхи çу уйăхĕччен çак ятпа пичетленнĕ вăл. Районсене пĕрлештерсе пысăклатсан вара «Ял пурнăçĕ» ята илнĕ, 55 çул ĕнтĕ вăл çак ятпа вулакан патне çитет.
Район хаçачĕн тиражĕ 1989 çулта 5217 экземпляра çитнĕ. Ку унăн историйĕнче чи пысăкки шутланать. Каярах, рынок условийĕсенче, хаксем ÿснĕ тапхăрта, тираж пĕчĕкленнĕ. Паян «Ял пурнăçĕ» 1450 экземплярпа тухса тăрать.
«Пĕчĕк мăйăрăн тĕшши тутлă» текен каларăш пур. Ăна шăпах редакцин паянхи коллективĕ пирки каланăн туйăнать. Пиллĕкĕн тăрăшаççĕ кунта. Хаçата нумай енлĕ, содержани тĕлĕшĕнчен пуян кăларса тăма общество корреспонденчĕсем пысăк пулăшу параççĕ. Вуншарăн вĕсем. Иртнĕ кунсенче «Хыпар» хаçат журналисчĕ Валентина Багадерова райхаçатăн общество корреспонденчĕсен пĕр ушкăнĕпе тĕл пулчĕ. Унта РФ Журналистсен пĕрлĕхĕн членĕсем Георгий Ефимов-Тусли, Гурий Дубров-Кăмакал Куркки тата Чăвашсен наукăпа ÿнер академийĕн членĕ Владимир Серафимов хутшăнчĕç. Валентина Николаевна ĕçтешĕсене çак паллă кун ячĕпе саламларĕ, ăнăçу сунчĕ, çыхăнусем малашне тата та çирĕпленсе пырассине палăртрĕ.
Георгий БОРЗИН.