11 марта 2021 г.
Литературăпа культура тата искусство «Тăван Атăл» журналăн пĕрремĕш номерĕнче Трак енпе çыхăннă материалсем те вырăн тупнă. Акă, Çĕнĕ çулăн малтанхи кунĕсенче, кăрлачăн 2-мĕшĕнче, пирĕн ентеш, Танăш ялĕнче çуралнă чăваш халăх поэчĕ Юрий Семенович Семенов /Сементер/ 80 çул тултарчĕ. Çавна май сумлă юбилейĕпе саламласа, журналăн 25-27-мĕш страницисенче унăн 10 сăввине вырăн панă.
* * *
«Хресчен сасси» хаçат вара /3-мĕш номер, кăрлачăн 27-мĕшĕ/ 5-мĕш страницăра «Аслă ăру» рубрика айĕнчи «Ача-пăча — ватă çын тĕрекĕ» корреспонденци пичетленĕ. Авторĕ — Красноармейскинчи Татьяна Борисова. Татьяна Ивановна унта Еншик Чуллăра пурăнакан Кира Софроновна Сергеева-Лаврентьева маттур хĕрарăмăн çемйи пирки ăшшăн çырса кăтартать. Сăн ÿкерчĕк те пур.