04 марта 2021 г.
Кăçалхи хĕле пĕлме йывăр: е юрпа чыхăнтарать, е шартлама сивĕпе тыллать, е çийĕнчех ăшăтса пăрахать. Çил-тăманĕ те, лапка-лапка юр çуни те куç умĕнчен каймасть.
Сивĕрен хăрама-и? Пĕтĕм тĕнчери Хĕрарăмсен кунне уявлас умĕн пулчĕ ку. Праккапа Çимукка, вăй питтисем, газ службин хастарĕсем, килĕрен-киле кĕреççĕ, «сенкер çулăм» хуçисене ырлăх кÿресшĕн вĕсем, газ оборудованийĕсене тĕрĕслеççĕ, сĕнÿ-канаш парса хăвараççĕ. Урампа тăкăрлăксенче йăрккакан хуçасăр йăтăсенчен те шикленмеççĕ. Ялсенче кĕтÿпех чупакан Улайккасемпе Хураçкасем тĕл пулкалаççĕ çав. Сарлака хул-çурăмлă Праккапа Çимукка та пĕрре мар курнă вĕсене. Кун пек чухне, чăнах та, чăмăрпа кăна çăлăнаймăн. Алăра селĕм юман патак е хурăн туя кирлех…
Нарăс уйăхĕн юлашки кунĕсенчен пĕри Праккапа Çимукшăн ăнăçуллă пулчĕ. Мăрьерен «сенкер тĕтĕм» тухакан кашни килтех пулма тăрăшрĕç арçынсем, хăйсем çине хунă яваплăха тивĕçлипе пурнăçларĕç. Хăть мĕнле ĕç-хĕлĕн те хакĕ пур, паллах… Çÿлтен хушу пулнă-çке. Кăçалтан газ тĕрĕслевне хальтерех ирттермелле. Укçине кирлĕ чухлĕ хыврăн-тăк, тархасшăн, квитанци те хатĕр санăн.
— Черечĕпе сирĕн кил-çурта та çит-рĕмĕр, — сывлăх суннă хыççăн ватăна пуç тайрĕ Пракка. — Техобслуживани пирĕн…
— Ĕç-хĕлĕн хакĕ пур. Тÿлевсĕр пурнăçланаймасть ĕç-хĕл, — сăмах хушрĕ вăрăмрах çан-çурăмли. — Çимукка ятлă эпĕ.
Пĕчĕкрех шăм-шаклă ватă кăштах ÿсĕрсе илчĕ те: «Йоккăр-маккăр, укçи-тенки çукрах-ха. Кĕсйи пушăрах».
Арçынсем тухса çухалчĕç. «Газ тытăмне тĕрĕслеттермеллехчĕ», — тута хĕррисене хускатса кăна юлчĕ ватă.
Кĕçех кĕсье телефонĕ сасă пачĕ. Çывăх тус-юлташĕ иккен. Кăмăллăн калаçать хăй:
— Фомич, саншăн укçа хыврăм. Газ тытăмĕн ĕçченĕсене кĕт.
Георгий Ефимов-Тусли.