25 февраля 2021 г.
Кунсерен тенĕ пекех Трак енри Виктор Даниловпа çыхăнса тăратăп. Вăл манран Çавалпа Шетмĕ тăрăхĕн çĕнĕ хыпарĕсене пĕлтерекен шанчăклă корреспондент мандатне тивĕçрĕ.
Çамрăклăхăма Трак хутлăхĕнче ирттернĕрен кунта пулса иртекен ырă пулăмсемпе вăхăтра паллашма май пурришĕн ăна чун-чĕререн тав сăмахĕ калатăп. Тата шурă хута хуратма тепĕр сăлтав та пур. Виктор Михайлович çут тĕнче ырлăх-савăнăçĕпе киленме килнĕренпе ĕнер черетлĕ çул çитрĕ.
Ашшĕпе амăшĕ тĕпренчĕкне «Виктор» ят хуни пĕрре те ăнсăртран мар: вĕсем унра пурнăç çулĕ тăрăх ыррине, лайăххине хушса пыракан, умри йывăрлăх-чăрмавсене парăнтаракан, кирек мĕнле ĕç тытсассăн та ăна вĕçне çитерекен çĕнтерÿçĕне курса тăнă. Ара, çак ят латин сăмахĕ иккен, чăвашла куçарсан «çĕнтерÿçĕ» тени пулать.
Çуралнă кун ячĕпе хатĕрленĕ сĕтел тавра ларнă май, Виктор Михайлович, ку таранччен утса тухнă çул-йĕрÿ çине тиркевлĕ куçпа пăхса илтĕнех ĕнтĕ. Çавăн чухне çав çул тÿрĕ те такăр маррине, унăн пăрăнăçĕсем йышлине, йăлтăр хĕвел тăтăш тенĕ пекех пуçу çине кĕмĕл шевлисене сапманнине, телей-савăнăçпа юнашарах кулянупа пăшăрхану вырăн тупнине яр-уççăн курса илтĕн пулас. Мĕншĕн çак шухăша хĕссе кăлартăм-ха пуçран? Куншăн мана кÿренмĕн, мĕншĕн тесен санăн пурнăçунта çÿçе кĕмĕл тĕс виттерекен самантсем пулмарĕç мар, эсĕ вĕсене чăтăмлăн та тÿсĕмлĕн чăтса ирттертĕн, Виктор пуçне усман Çĕнтерÿçĕ пулнине туллин çирĕплетсе патăн.
Еншик Чуллă ăста та пултаруллă çын сахал мар çуратса ÿстернĕ. Вĕсен йышне эпĕ сана та шанчăклăнах кĕртетĕп. Ăсталăхупа тавра курăмна пĕрмаях ÿстерсе пырса, пурнăçна тăван район хаçачĕпе тата радиохыпарлавĕпе çыхăнтартăн, ентешÿсене мĕн паянхи куна çитичченех очерк-тĕрленчĕкÿсемпе хавхалану кÿрсе тăратăн, Виктор Тавкилĕн чунтан тухакан сăмахĕсем вулакансен кăмăлĕнче çĕкленÿллĕ туйăмсем çуратаççĕ. Хăнăхнă йăлана ÿлĕмрен те çирĕппĕн тытса пырсамччĕ, çамрăклăхра суйласа илнĕ çул-йĕртен ан пăрăнсамччĕ.
Геннадий КУЗНЕЦОВ