25 февраля 2021 г.
Çакна палăртрĕç районти потребительсен обществин уполномоченнăйĕсем эрнекун ирттернĕ отчетлă пухура.
Отчетлă пуху райпон хĕрлĕ кĕтесĕнче иртрĕ. Уполномоченнăйсем мандат комиссин докладне итленĕ хыççăн пуху секретариатне, президиумне суйларĕç, кун йĕркине, регламента çирĕплетрĕç, ĕç органĕсене суйларĕç. Пухăва район администрацийĕн пуçлăхĕ Александр Кузнецов, Чăвашпотребсоюз правленийĕн председателĕн çумĕ Ирина Яшмолкина хутшăнчĕç. Сăмахăма пуçличчен çакна каласа хăварам. Районти потребильсен оществин апат-çимĕç таварĕсем сутакан 3-мĕш лавкки çывăхĕнче пурăннă май\çăкăрне те, тăварланă пуллине те, кăлпассине те, шăрпăкне те унтан туянатпăр. Мăшăр та, хулара пурнăнакан ачасем те хамăр райпо таварне питĕ килĕштереççĕ.
Райпо канашĕн председателĕ Роза Николаева отчетлă тапхăрти\ĕçе пĕтĕмлетсе доклад турĕ, пĕрлĕх ĕç-хĕлне уçса паракан вун-вун цифрăпа паллаштарчĕ. «Тăван райпон ĕçĕ-хĕлне тĕреклетессишĕн Чăвашпотребсоюзăн, райадминистрацин йышăнăвĕсене пурнăçа кĕртессишĕн, экономика тухăçлăхне ÿстерессишĕн, инноваци аталанăвне вăйлатассишĕн, кооперативлă харпăрлăха сыхласа хăварассишĕн тата хамăрăн пĕрлешĕвĕн ят-сумне çĕклессишĕн тăрăшрăмăр, — терĕ вăл. — Конкуренци ÿснĕ май суту-илÿ ĕçне лайăхлатассине, тавар туянакансен ыйтăвĕсене туллин тивĕçтерессине ытларах тимлĕх уйăртăмăр. Йывăрлăхсем пулнă. Кăна пытарма кирлĕ мар, анчах вĕсене çĕнтерме пултартăмăр. Пирĕн тĕп тĕллев экономика тухăçлăхне хăпартасси, райпора вăй хуракансен ĕç условийĕсене лайăхлатасси пулнă. Малашне те çаплах пулĕ».
Паян райпо çумĕнче 5 тытăм: райпо /92 çын/, «Восход Плюс» /44/, «Общепит» /31/, «Красноармейскинчи çăкăр комбиначĕ» /39/, «Куславккари коопторг» /45/ — ĕçлет. 2020 çулта кунти ĕçченсен йышĕ 251 çынпа танлашнă. Райпон пĕлтĕрхи пĕтĕмĕшле ĕç-хĕлĕн кăтартăвĕ 546,2 млн тенкĕпе /ÿсĕм 110,4 процент/ танлашнă. Кунта, паллах, вак суту-илÿ пысăк вырăнта тăрать: 430,5 млн тенкĕ. Вăтам ĕç укçи 22846 тенкĕпе танлашнă. 64 лавкка ĕçлет. Иртнĕ çул Куславкка районĕнчи Тĕрлемесре «У дома» лавкка уçăлнă. Унăн уйăхри тавар çаврăнăшĕ 818 пин тенкĕпе танлашнă. Районти мĕн пур суту-илÿ вырăнне автоматизациленĕ. Вĕсенчен 23-шĕнче ĕç-хĕле самообслуживани мелĕпе йĕркеленĕ. Районти обществăлла апатлану предприятийĕсене автоматизацилесси пырать. Çак ĕçе «Пельменная» тата «Витязь» кафесенче пурнăçланă ĕнтĕ. Иртнĕ çул райпо бюджета 29,4 миллион тенкĕ куçарнă. Вак суту-илÿ тумалли тĕллеве — 109,1, тавар продукцине сутассине — 113,9, хатĕрлев ĕçĕпе 114 процент пурнăçланă.
Райпора Трак енри бюджетлă организацисен ыйтăвĕсене тивĕçтерес тĕлĕшпе те туллин ĕçлеççĕ. Çапла май иртнĕ çул кассăна 8,5 млн тенкĕ кĕнĕ. Обществăлла апатлану предприятийĕ 5 кафене /çак шутра Куславккари «Встреча» та/, 1 закусочнăя, кондитер тата пулă цехĕсене пĕрлештерет. Иртнĕ çул общепитăн кăтартăвĕ 26,8 млн тенкĕпе танлашнă. Шел те, кăтартусем паянхи лару-тăрăва пула та чакнă.
Районти потребительсен обществин тĕп тĕллевĕсем те паллă. Вĕсене пурнăçлама çакăн евĕр ĕçсем тума палăртнă: райпон мĕн пур тытăмĕн тупăшлăхне ÿстересси, кăтартусене пысăклатасси, çĕнĕ продукци хатĕрлесси тата вĕсене суту-илĕве кăларасси, тĕрлĕ конкурссемпе куравсене хутшăнасси./Вĕçĕ.
Районти потребительсен обществи ырă ĕç сахал мар пурнăçланă. Çакна Роза Александровна хăйĕн докладĕнче пĕр хутчен çеç мар асăнчĕ. Акă, республикăри «Чи лайăх продукци» конкурсăн «2020 çулхи чи аван çăкăр-булка» номинацире Трак енсен «Цивильный» çăкăрне 1-мĕш степеньлĕ дипломпа чысланă. «2020 çулхи чи лайăх кондитер таварĕ» тупăшура «Северные» пĕремĕк 1-мĕш степеньлĕ диплома тивĕçнĕ. Ырă ĕç яланах хисепре. «Районти çăкăр комбиначĕ» обществăн директорĕ Елена Сидорова республикăри «Хĕрарăм — лидер» тупăшура «Хĕрарăм — çулталăк ертÿçи» номинацире иккĕмĕш вырăна тухнă. Кунтах ĕçлекен Елена Борисова технолог вара «Раççейри чи лайăх 100 тавар — «Пахалăх отличникĕ» тупăшура палăрнă, «2020 çулхи чи лайăх çамрăк специалист» районти конкурсра иккĕмĕш вырăн йышăннă.
Ÿсĕмĕсем курăмлă. Кăна пытараймăн. Акă, çăкăр комбиначĕ кăна 35,6 млн тенкĕлĕх продукци кăларнă. Çакна уйрăммăн палăртмалла: коронавирус инфекцийĕ алхаснă тапхăрта та асăннă пĕрлĕх хăйĕн ĕçне чарса лартман. Кăтартăва 28 процент ÿстерме пултарнă. Кунти продукцие хамăр районти, «Куславккари коопторг» общество, Шупашкарпа Çĕнĕ Шупашкарти 20 ытла суту-илÿ предприятийĕ туянать.
Иртнĕ çул çăкăр тата çавăн йышши таварсене — 426 /ÿсĕм 112,7 процент/, кондитер изделийĕсене — 94,7 тонна /117,6/, макарон изделийĕсене 10,6 тонна туса кăларнă. Ĕç калăпăшĕ ÿснĕ май ĕç укçи те хăпарнă, вăл 21456 тенкĕпе танлашнă. Кунта çĕнĕ продукци кăларас енĕпе те ăнăçлă ĕçлеççĕ: иртнĕ çул çĕнĕрен 11 тĕрлĕ апат-çимĕç, çак шутра «Ядринское» полешки, «Николь», «Черная луна» печени, «Фантазия», «Кофейные» пĕремĕк, «Яблочная» булочка, «Нефеголь» зефир, «Чудо» кекс тата ыт.те хатĕрленĕ.
«Витязь» çăкăр çĕршыври «Раççейĕн чи лайăх таварĕ» тупăшура палăрнă. Вăлах «Чăваш Енĕн чи пахалăхлă марки» конкурсра диплом çĕнсе илнĕ. 2020 çулта кондитер тата çăнăхран хатĕрленĕ таварсене — 40,5, çурма фабрикатсене — 19,3, тăварланă тата тĕтĕмленĕ пулă 26,5 тонна туса кăларнă.
Паллах, паян суту-илÿ вырăнĕсенче хăтлăх кирлĕ. Иртнĕ çул райпора 1590 пин тенкĕлĕх юсав ĕçĕсем туса ирттернĕ. Газ кăмакипе усă курса вĕри шывпа тивĕçтерме пуçланă, çапла май 136,25 пин тенкĕ перекетлеме пултарнă. Иртнĕ çул çăкăр комбиначĕ валли паянхи вăхăт ыйтакан çĕнĕ оборудовани туяннă. Ăшă та кăпăшка çăкăра вăхăтра лавккасене çитерме 1110 пин тенкĕ тăракан автомобиль туяннă.
Обществăлла апалану предприятийĕсем те лайăх енчен палăраççĕ. Иртнĕ çул райпона тÿлевлĕ çăмăллăхсем — 1228 пин, йăла çăмăллăхĕсем 771 пин тенкĕ кÿнĕ. Кунсăр пуçне райпо Трак енри водительсене медицина тĕрĕслевĕ витĕр тухма та пулăшать. Иртнĕ çул медицина кабинечĕн пулăшăвĕ 40 пин тенкĕпе танлашнă, районти 5 предприятипе килĕшÿ тунă. 2020 çулта райпона хатĕрлев ĕçĕпе 48,6 млн тенкĕ пырса кĕнĕ /ÿсĕм 114 процент/. Кунта уйрăмах ял çыннисенчен сĕт пухассине пысăк тимлĕх уйăраççĕ. Иртнĕ çул халăхран 1215 тонна пухнă. Ял çыннисене 10990 пуç кайăк-кĕшĕк сутнă.\Ку кăтарту 2019 çулпа танлаштарсан 2,3 хут пысăкланнă. Трак ен халăхне 3,6 тонна çĕр улми, 4,6 тонна сухан, 52 тонна удобрени сутнă.
Доклада сÿтсе явма райпо тытăмĕн ветеранĕ Альбина Дмитриева, «Восход Плюс» директорĕ Марина Евграфова, «Красноармейскинчи çăкăр комбиначĕ» обществăн технологĕ Елена Борисова хутшăнчĕç, ырă сĕнÿ-канаш пачĕç. «Паян пирĕн райпона строительство лавкки питех те кирлĕ», — терĕ Альбина Ильинична.
Пуху кун йĕркине кĕртнĕ ыйтусемпе тĕллевлĕ йышăнусем турĕ. Ревизи комиссийĕн доклачĕпе Зинаида Захарова тухса калаçрĕ. Çавăн пекех Чăвашпотребсоюз правленийĕн председателĕн çумĕ Ирина Яшмолкина, район администрацийĕн пуçлăхĕ Александр Кузнецов сăмах каларĕç, ĕçре пысăк çитĕнÿсемпе палăрнисене парнесемпе чысларĕç. Иртнĕ çулхи виççĕмĕш кварталти лайăх кăтартусемшĕн Ирина Юрьевна Роза Александровнăна Хисеп хучĕсем парса тав турĕ. Райпо ветеранĕ, общество ĕçĕн хастарĕ Альбина Дмитриева «Чăваш автономине йĕркеленĕренпе 100 çул» юбилей медальне, райпон тĕп бухгалтерĕ Ольга Суховетрюк, Лариса Тимофеева пай пуçлăхĕ, Еншик Чуллăри лавкка заведующийĕ Альбина Григорьева «Раççей потребсоюзне 180 çул» медале, Георгий Иванов водитель, Наталия Девяткина пекарь республика шайĕнчи Хисеп хучĕсене, Сергей Асанов газ операторĕ, Алманчри тата Енĕшкассинчи лавккасен заведующийĕсем Раиса Федоровăпа Людмила Викторова, обществăлла апатлану предприятийĕн директорĕ Людмила Афанасьева район администрацийĕн Тав хучĕсене тивĕçрĕç.
Юрий Борисов.