18 февраля 2021 г.
Ура айĕнче юр кăчăртатать. Кăчăр! Кăчăр! саланать сасă таврана. Хул пуççи урлă çакнă сумккăпа утать вăл. Тин кăна-ха «Газельтен» анса юлчĕ Роза. Халь, акă, аслă çулпа юнашарти Çĕнĕ урампа утать. Хаçат-журнал тусĕсене çĕнĕ кăларăмсемпе паллаштармалла унăн.
Чи малтанах кăçал сакăр теçетке çул çавăрса хуракан Петр Яковлевăн кирпĕч çурчĕ умĕнче чарăнчĕ. Хĕç-пăшаллă Вăйсен ветеранĕ район хаçачĕн тусĕ вĕт. Шел, мăшăрне çухатрĕ иртнĕ çул. Чита хĕрĕпе Тамара Михайловнăпа аллă çул пурăнчĕç-çке… Питĕ шел…
Çар ветеранĕнчен уйрăлчĕ çеç Роза Евграфовна — Ирина Александровăна тĕл пулчĕ. Владимир Александров механизатор-фермерăн мăшăрĕ вăл. Тĕрĕссипе, Вăрнар тăрăхĕнчи Çăкаллă Явăш хĕр-упраçĕ. Ачисем те йышлă Александровсен.
— Мĕн çыраççĕ паян «Ял пурнăçĕнче? — йăл кулăпа калаçрĕ Ирина. — Пĕррехинче район хыпарçинче манăн хуняма пирки те çырса кăтартнăччĕ-ха.
Унтан сăмах Мария Александрова сакăр теçетке урлă каçнă Маруç аппа тавра сыпăнать.
Роза Трофимова почтальонка çула май Нина Андреева, Григорий Фомин килĕсене те çитрĕ. Кашнинех çапла кĕçнерникун «Ял пурнăçĕпе» тивĕçтерет вăл.
— Манăн тăван кĕтес — Туçи Чуракасси. Халь унта аттен шăллĕ Аврам Николаев пурăнать. «Ял пурнăçĕ» хаçатăн чи çывăх тусĕ вăл. Çырăнса илет, хăй те çырать. Вăл çырнă корреспонденцисене тулли кăмăлпа вулатăп, — тет Зоя Ивановна. — Ÿркенмен арçын…
Вăтам пÿ-силлĕ хĕрарăм Çĕнĕ урампа çаврăнчĕ те Первомайски урамне çул тытрĕ. Кунта та ăна район хыпарçин çывăх тусĕсем кĕтеççĕ. Ура айĕнче шăнса пăрланнă юр кăчăр! кăчăр! сасă парать. Тулли сумкка хуçипе сăмахлать тейĕн. «Сывлăх мĕнле? Çырăнтару еплерех»? — ыйтнăн туйăнать.
Почтальонка кунне миçе çухрăм утать-ши? Роза Евграфовна Пайсупин ялĕнче çеç мар, Упире те кĕтнĕ çын. Хул пуççи урлă çакнă сумкки яланах тулли унăн. Хаçат-журнал, пенси укçи çеç мар, тĕрлĕрен тавар вырăн тупнă унта. Почтальонка сутуçă та. Çапла вăл 8 çула яхăн урамсемпе тата тăкăрлăксемпе утать. Кирек мĕнле çанталăкра та…
Георгий Ефимов-Тусли.