18 февраля 2021 г.
Вĕсем ăнăçлăрах ĕçлеме хавхалантараççĕ
Красноармейски районĕнче бассейн пулать. Салара спорт обĕекчĕн строительствине пуçарассине республика Пуçлăхĕ Олег Николаев районта ĕçлĕ визитпа пулнă вăхăтра палăртрĕ.
Юлашки çулсенче Красноармейски районĕнче спорт инфратытăмĕ аталансах пырать. Иртнĕ çул, тĕслĕхрен, салара футбол уйĕ хута янăччĕ. Халĕ акă ачасемпе çамрăксен спорт шкулне юсанă. Хывăнса тăхăнмалли, çăвăнмалли, инвентарь упрамалли пÿлĕмсем, спорт залĕ — пĕтĕмпех çĕнелнĕ. Кунта спортăн çичĕ тĕсĕпе тренировкăсем ирттереççĕ, шкулсемпе ача сачĕсенчен 600 ытла ача çÿрет. Ултă çулти Кристина та спорт шкулне юратса килни çинчен каласа кăтартрĕ: «Эпир кунта мечĕкпе вылятпăр, сикетпĕр, хырăмпа шăватпăр... Манăн чупакан спортсмен пулас килет».
Олег Николаев çĕнелнĕ спорт шкулĕпе паллашнă май кадр ыйтăвне те хускатрĕ. Учреждени директорĕ Владимир Моисеев çамрăк специалистсем сахалли пирки пăшăрханса калаçрĕ. Çакăн сăлтавĕсенчен пĕри вăл, ахăртнех, тренерсен шалăвĕ пĕчĕкки. Ача-пăча спорт шкулĕсенче ĕçлекенсем вĕрентÿ тытăмĕн ĕçченĕсен шутне кĕменрен хушма вĕрентÿ учрежденийĕсен преподавателĕсемпе танлаштарсан сахалрах ĕç укçи илеççĕ. Вĕсем пĕр ĕçех тăваççĕ, анчах çак специалистсене тĕрлĕрен хавхалантараççĕ. «Ку ыйтăва Чăваш Республикинче наци проекчĕсене пурнăçламалли çул-йĕре пăхса тухнă чухне те çĕкленĕччĕ, — терĕ Олег Николаев. — Тĕрĕс марлăх пур кунта. Çакнашкал лару-тăру тивĕçлĕ мерăсем йышăнма хистет». Ыйтăва Чăваш Енрен РФ Патшалăх Думине суйланнă депутатсемпе тата сенаторсемпе пĕрле татса пама май килессине шаннине пĕлтерчĕ вăл.
Республика Пуçлăхĕ «Колосок» ача садне те çитсе курчĕ. Кунта та пĕлтĕр юсав ĕçĕсем пурнăçланă. Çурт стенисене ăшă тытакан материлсемпе çирĕплетнĕ, шыв, канализаци тытăмĕсене улăштарнă, санузелсене юсанă. Садикре юсав вĕçленмен-ха, кăçал çурт тăррине, ăшă, электричество тытăмĕсене улăштарма, пÿлĕмсене юсама, ытти ĕçе тума палăртнă. «Çурт улшăнса çĕнелни тÿрех курăнать, — терĕ Олег Николаев садикпе паллашнă хыççăн. — Анчах та юсава тÿрех вĕçне çитерменни лайăхах мар. Строительствăпа юсав ĕçĕсем патне тепĕр хут таврăнма тивни питĕ мелсĕр. Пĕр учреждени ĕç-хĕлне икĕ хутчен чарса лартма тивет».
Олег Алексеевич Чăваш Республикин Патшалăх Канашне янă Çырăвĕнче ĕç тăвакан влаç органĕсен умне социаллă учрежденисен строительствине, юсавне, модернизацине пурнăçланă чухне комплекслă мерăсене тĕпе хума тĕллев лартни çинчен аса илтерчĕ. Çакă пĕлтерĕшлĕ ĕçсене пĕр производство тапхăрĕнче вĕçлеме май парĕ.
Çулталăк пуçламăшĕ — пĕлтĕрхи ĕç-хĕле пĕтĕмлетсе малашлăх тĕллевĕсене палăртмалли тапхăр. Красноармейскисем те районăн социаллă пурнăçпа экономика аталанăвĕн иртнĕ çулхи кăтартăвĕсене пăхса тухрĕç. Ларăва республика Пуçлăхĕ Олег Николаев та хутшăнчĕ. «Ĕç-хĕле пĕтĕмлетнĕ май çитĕнÿсемпе те мăнаçланма пĕлмелле. Вĕсем малашлăхра ăнăçуллăрах ĕçлеме хавхалантарччăр, — терĕ вăл. — Çав вăхăтрах çитменлĕхсене асăрхамасăр та иртмелле мар. Вĕсен сăлтавĕсене тĕплĕ тишкермелле. Çакăн пек анализ туни малашнехи ĕçсене çирĕп йĕркепе туса пыма пулăшĕ. Пирĕн тĕллев — экономикăна вăйлатасси. Ку енĕпе, паллах, пурин те пĕр шухăшлă пулса тăрăшмалли куç кĕрет».
Красноармейски районĕ ĕлĕкренпех ура çинче çирĕп тăракан муниципалитетсенчен пĕри шутланать. Çак юхăма вĕсем йывăр çак тапхăрта та сыхласа хăварма пултарнă. Коронавирус инфекцийĕ кăларса тăратнă чăрмавсем те, сăмахран, унăн аталанăвне ура хурайман. Çакă район администрацийĕн пуçлăхĕ Александр Кузнецов кашни отраслĕн çитĕнĕвĕсемпе çитменлĕхĕсене пайăррăн палăртса тунă докладĕнчен те аван курăнчĕ. Пĕлтĕр налук пухасси ÿснĕ, ĕç укçи виçи пысăкланнă, шалу парăмĕсем çук, уй-хиртен нихçанхинчен нумайрах тĕш тырă пухса кĕртнĕ, пысăк калăпăшлă инвестици проекчĕсем пурнăçланаççĕ, çавна май çĕнĕ ĕç вырăнĕсем йĕркеленеççĕ, вак суту илÿ çаврăнăшĕ, общество апатланăвĕн кăтартăвĕсем ÿснĕ, ĕçсĕррисен шучĕ чакнă... Район пушă çĕрсене пусă çаврăнăшне кĕртес тĕлĕшпе те кăтартуллă ĕçлет. «Пĕлтĕр 2 пин ытла гектар çĕре тара патăмăр. Пушă выртаканни урăх юлман пулĕ тенĕччĕ. Чатукасси ял тăрăхĕнче тупăнчĕ. Вăрман пусса илнĕскере тасатнă хыççăн ĕçе кĕртетпĕр, — терĕ Александр Кузнецов. — Гидротехника сооруженийĕсене кадастр учетне тăратма пуçларăмăр. Пирĕн районта вĕсем 16, пурне те юсамалла. Çитес вăхăтра ятарлă программăна кĕрсе ку енĕпе ĕçлеме пуçласшăн».
Район ертÿлĕхĕн тĕп тĕллевĕ, паллах, тавралăха илемлĕрех, тасарах тăвасси, çынсен пурнăçне лайăхлатасси, хăтлăлатасси. Красноармейскинче бассейн çукки вара сала халăхне çеç мар, ытти ялсенче пурăнакансене те пăшăрхантарать. Ку ыйту паян кăна хускалнăскер мар, пуçаруллă ушкăн пĕлтĕрех ун пирки калаçма пуçланă. «Бассейн кирлех. Вăл çукки çынсен кăмăлне питĕ пусарать, — терĕ Александр Кузнецов. — Пирĕн район çыннисене Çĕрпĕве тата Шăхасана шыва кĕме çÿреме çывăхах мар». Администраци ертÿçин сăмахĕсемпе Олег Николаев та килĕшрĕ: «Бассейн пулмаллах. Манăн шухăшăмпа, ку енĕпе урăх ыйту сиксе тухмалла мар. Строительствăна пуçармалла». Çапла вара проектпа смета документацийĕсен патшалăх экспертизине вĕçленĕ хыççăн республика ертÿçи пулăшнипе кăçал Красноармейски районĕнче бассейн тума пуçлама йышăнчĕç. В. БАГАДЕРОВА