18 февраля 2021 г.
Мăн Шетмĕри Совет Союзĕн Геройĕ Владимир Васильев ячĕллĕ пĕтĕмĕшле пĕлÿ паракан вăтам шкулта вĕренекенсем кунтан пĕлÿ илсе тухнă Святослав Сергеев курсантпа тĕл пулнă.
Святослав Сергеева пирĕн вĕренекенсем аван пĕлеççĕ. Паян вăл Мускаври Федерацин патшалăх çар университечĕн иккĕмĕш курсĕнче пĕлÿ пухать.
Святослав Игоревич ачасене сроклă службăна ракета çарĕсенче ирттерни, салтак шинельне хывнă хыççăн аслă шкула вĕренме кĕни, малтанхи йывăрлăхсем, çамрăк боецăн курсĕ, присяга тытни пирки тĕплĕн каласа кăтартрĕ.
Вăл пĕлÿ илекен университетра факультетсем йышлă, хăшĕ-пĕринче хĕрсем те вĕренеççĕ. Ачасем психологи факультечĕ пирки каласа кăтартнине тĕплĕн итлесе ларчĕç, ыйтусем те пачĕç.
Мускав хăни вĕренекенсене аслă шкул пирки буклетсем валеçсе пачĕ, видеофильмсем кăтартрĕ. Вĕсем курсант пурнăçне хăйсен куçĕпе курса ĕненчĕç.
Татьяна Антонова.