18 февраля 2021 г.
ЧР Министрсен Кабинечĕн ЧР Пуçлăхĕ Олег Николаев ертсе пынипе иртнĕ ларăвĕнче «вăрçă ачисен» ЖКХ тăкакĕсене саплаштарма йышăннă.
Çакăн евĕрлĕ çăмăллăх пуласси пирки Чăваш Ен Пуçлăхĕ Олег Николаев ЧР Патшалăх Канашне янă Çырăвĕнче каланăччĕ. Унтанпа вăхăт нумай та иртмерĕ — саккун проектне хатĕрленĕ. Унпа килĕшÿллĕн, ĕçлев министрĕ Алена Елизарова пĕлтернĕ тăрăх, «вăрçă ачисен» хушма çăмăллăх пулать. Хваттершĕн тата коммуналлă пулăшу ĕçĕсемшĕн çак статуслă çынсем 25% танлашакан çăмăллăхпа усă курса тÿлĕç. Енчен те гражданинăн темиçе сăлтавпа çăмăллăхпа усă курмалли ирĕк пур тăк — вĕсен пĕрне суйласа илмелле.
Чÿк уйăхĕн 1-мĕшĕ тĕлне республикăра «вăрçă ачин» статусне илмелли ирĕк пуррисен шучĕ 64,5 пин çынпа танлашнă. Тивĕçлĕ удостоверение илнисем хальлĕхе 40 пин çынна яхăн.
Вăрçă тата ĕç ветеранĕсене, репрессиленĕ граждансене паракан тÿлеве индексацилеме те йышăннă. Тÿлев 1,0291 хут пысăкланать. Çапла вара индексаци хыççăн тыл ĕçенĕсене уйăхсерен паракан укçа 1175 тенкĕпе танлашĕ, вăрçă тата ĕç ветеранĕсем 1238 тенкĕ илĕç, реабилитациленисем — 2965, политика репрессийĕсене пула шар курнă тесе йышăннисем — 2640 тенкĕ.
Пурăнма кирлĕ чи пĕчĕк виçене палăртас тĕлĕшпе çĕнĕлĕх пур. Унччен минимума кварталсерен палăртнă, малашне вара федераци саккунĕпе килĕшÿллĕн вăл çулталăклăх пулĕ. Куçăм тапхăрĕнче — авăн уйăхĕн 15-мĕшĕччен. Ăна 9804 тенкĕ шайĕнче çирĕплетнĕ. Анчах иртнĕ çулхи тăваттăмĕш кварталшăн унчченхи йĕркепех усă курмалла. Ăна та асăннă виçе шайĕнче хăварма палăртнă.