11 февраля 2021 г.
Нарăсăн 5-6-мĕшĕсенче Шупашкарти В.Н. Кочетов ячĕллĕ 5-мĕш спорт шкулĕнче 2006-2008 тата 2001-2003 çулсенче çуралнă хĕрсемпе каччăсем хушшинче ирĕклĕ майпа кĕрешес енĕпе республика шайĕнчи ăмăртусем иртрĕç.
Ку хутĕнче асăннă тупăшусенче район чысне çак спортсменсем хÿтĕлерĕç: юниоркăсем хушшинче Красноармейски салинчи Наташа Данилова; шкул ачисем хушшинче: Трак вăтам шкулĕнчи Катя Лыскова, Августина Михайлова, Даша Осипова, Дима Абрамов, Леня Алексеев; Пикшик шкулĕнчи Наташа Антонова, Даниил Степанов; Красноармейски вăтам шкулĕнчи Маша Харитонова; Упи вăтам шкулĕнчи Маша Константинова, Наташа Афанасьева, Люда Александрова, Мария Кириллова, Эвелина Антонова; Кĕçĕн Шетмĕри пĕтĕмĕшле пĕлÿ паракан тĕп шкулти Никита Крюков, Даниил Андреев. Çакна палăртса хăвармалла: çак вĕренÿ çулĕнчен Кĕçĕн Шетмĕ шкулĕнче ирĕклĕ майпа кĕрешекенсен секцине Раççей спорт мастерĕ Валерий Никитин тренер йĕркелесе ячĕ.
Икĕ куна пынă кĕрешÿсене пирĕн спортсменсем япăх мар кăтартусемпе вĕçлерĕç — Катя Лысковăпа /70 кг/ Даша Осипова /36/ хăйсен виçисенче пĕрремĕш вырăн çĕнсе илчĕç, ылтăн медальсене тивĕçрĕç, Маша Константинова иккĕмĕш пулчĕ.
Асăннă ăмăртусене кайса килме пулăшнăшăн ачасемпе çамрăксен спорт шкулĕн тренерĕсене Эдикт Хайбуллинпа Валерий Никитина, Олег Степанов предпринимателе кĕрешÿçĕсен тата ашшĕ-амăшĕ ячĕпе тав сăмахĕ калатăп.
Владимир Григорьев,
ЧР тава тивĕçлĕ тренерĕ