11 февраля 2021 г.
Коронавируспа чирлекенсен йышĕ майĕпен чакать, анчах çакă маска режимне пăрахăçламаллине пĕлтермест. Акă, ĕнерхи кун тĕлне Чăваш Енре çак амакпа чирлĕ 20154 çынна тупса палăртнă, 18251-шĕ сывалнă, 926-шĕ пурнăçран уйрăлнă. Çав-çавах çак хăрушă вирусран тăван республикăра кунсерен 10-12 çыннăн пурнăçĕ татăлать.
Çĕнĕ çула кĕрсен çĕршывра коронавирус инфекцийĕнчен хÿтĕлекен прививка тăвасси анлăн сарăлчĕ. Нумаях пулмасть центрти телевиденипе Раççей Президенчĕ Владимир Путин çапла каларĕ: «Паянхи куна Раççей Федерацийĕ çак хăрушă вирусран виçĕ вакцина туса хатĕрленĕ тĕнчере пĕртен-пĕр çĕршыв».
Коронавирус инфекцийĕнчен хÿтĕленме прививка тăвасси Трак енре мĕнле пырать-ха? Çак ыйтăва эпĕ ЧР Сывлăх сыхлав министерствин «Васкавлă медицина пулăшăвĕн больници» БУн «Красноармейски районĕн тĕп больници» филиалĕн заведующине Майя Григорьевăна патăм.
— Халĕ ытларах пире вакцинаци ыйтăвĕ калаçтарма пуçларĕ, — тет Майя Валерьевна. — Çулталăк пуçланнăранпа района 410 доза «Спутник V» /ăна «Гам-КОВИД-Вак» та теççĕ-авт./ килнĕ. Чи малтан халăхпа ытларах тĕл пулакан сферăри çынсене вакцинаци тума пуçларăмăр. Çак тапхăрта медицина ĕçченĕсенчен 74-шĕ вакцинацин пĕрремĕш тапхăрне тухнă, 10-шĕ вакцинацие вĕçленĕ, социаллă ĕçченсенчен 38-шĕ 1-мĕш, иккĕшĕ 2-мĕш, педагогсенчен 15-шĕ пĕрремĕш тапхăр витĕр тухнă. Ку ĕç малалла пырать.
Кÿрсе килнĕ дозăсене ятарлă сивĕтмĕшре упрамалла. Пирĕн ку таранччен вăл пĕрре çеçчĕ. Иртнĕ кунсенче тата виççĕпе тивĕçтерчĕç. Паян эпир коронавирус инфекцийĕнчен хÿтĕленмелли прививкăсене филиалăн прививка кабинетĕнче /Красноармейски ялĕ, Çĕнтерĕве 30 çул урам, 7-мĕш çурт/ тăватпăр. Çитес вăхăтра тата 9 пункт йĕркелеме пăхатпăр: ял тăрăхĕсенчи врач офисĕсемпе фельдшерпа акушер пункчĕсенче.
Чăваш Енри Сывлăх сыхлавĕн министерстви авăн уйăхĕ вĕçленнĕ тĕле аслисен 60 процентне /550-570 пин çын/ прививка тăвасшăн. Пире те ятарлă задани çитернĕ: шурă халатлисен Трак енри 4,5 пин çынна çак хаяр вирус инфекцийĕнчен прививка тумалла. Халĕ çав тĕллеве пурнăçлассишĕн тăрăшатпăр та». Георгий Борзин