04 февраля 2021 г.
Оборонăпа массăллă тата спорт ĕçĕн уйăхлăхĕ пынă май халĕ чылай çĕрте çар тата патриотла воспитани темисемпе мероприятисем иртеççĕ.
Иртнĕ кунсенче пире, ГСВГ ветеранĕсене, пĕтĕмĕшле пĕлу паракан Алманч вăтам шкулĕн вĕренекенĕсем хăнана чĕнчĕç. Манпа пĕрле Германи çĕршывĕнче çар хĕсметĕнче пулнă Георгий Иванов та пычĕ.
Питех те ăшшăн кĕтсе илчĕ пире Алманч вăтам шкул коллективĕ. Олег Димитриев ерт(çĕ педагогсемпе паллаштарчĕ, шкул пурнăçĕ çинчен каласа кăтартрĕ, кăсăклантаракан ыйтусене хурав пачĕ, кабинетсем тăрăх пĕчĕк экскурси йĕркелерĕ.
Ун хыççăн 6-7-мĕш классенче вĕренекенсемпе тĕл пулăва пухăнтăмăр, вăл «Паттăрлăх урокĕ» ятпа иртрĕ. Георгий Ивановичпа иксĕмĕр хĕрсемпе каччăсене Германи çĕршывĕнче ирттернĕ салтак пурнăçĕ çинчен каласа кăтартрăмăр. Тăван çĕршыва юратма, лайăх вĕренме сунтăмăр. Питех те тимлĕн итлерĕç пире вĕренекенсем. Вĕçĕнче вĕсен вун-вун ыйтăвĕ çине хурав пама тиврĕ.
Юлашкинчен вĕренекенсене патриотла воспитани парас ĕç çине пысăк тимлĕх уйăрнăшăн шкул директорĕн Олег Димитриевăн кăкăрĕ çине «Тăван çĕршывăн 1941-1945 çулĕсенчи Аслă вăрçинче Çĕнтерÿ тунăранпа 75 çул çитнĕ май» юбилей медалĕ çакса ятăмăр.
Питех те кăмăллă юлчĕç вĕренекенсем тĕл пулупа.
Владимир Соколов,
Совет çарĕсен Германири ушкăнĕн /ГСВГ/
ветеранĕсен союзĕн районти уйрăмĕн ертÿçи