04 февраля 2021 г.
Кăрлач уйăхĕн вĕçĕнче ял хуçалăхĕнчи паха та ырă опытпа паллашма Трак ене Хĕрлĕ Чутай районĕн делегацийĕ килнĕ.
Йышра — Сăр тăрăхĕнчи «Коминтерн» хуçалăх ертуçи, РФ ял хуçалăхĕн тава тивĕçлĕ ĕçченĕ Альбина Новикова, Николай Воронов тĕп агроном, Анатолий Куропаткин тĕп инженер. Вĕсем «Красное Сормово» хуçалăхра пулса курнă. Хăнасене общество ертуçи Святослав Иванов кĕтсе илнĕ. Ăшă мероприятие çавăн пекех район администрацийĕн пуçлăхĕ Александр Кузнецов хутшăннă.
Паян «Красное Сормово» Трак енре туллин аталанса пыракан хуçалăх, вăл сĕт тата аш-какай туса илес енĕпе специализациленнĕ. Святослав Петрович хăнасене обществăн объекчĕсем тăрăх кăтартса çуренĕ. Кунта нумаях пулмасть хута янă фермăра сăвакан 400 ĕне тытаççĕ. Халĕ Яманаксен витесенче пĕтĕмпе 1 пине яхăн пуç мăйракаллă шултра выльăх, 1974 пуç сысна. Предприятире сĕт туса илесси малтисен йышĕнче. Иртнĕ çул, авă, кунта кашни ĕнерен 7370 килограмм продукци илнĕ. Выльăх-чĕрлĕхе ытлăн-çитлĕн тăрантарма 1623 гектар çĕрпе усă кураççĕ.
Машинăпа трактор паркне çĕнетме пĕлтĕр 32 миллион тенкĕлĕх 27 единица техника туяннă.
Александр Николаевич хăнасене район, унăн малашлăхĕпе пуласлăхĕ çинчен каласа кăтартнă. Çакна палăртма кăмăллă: иртнĕ çул Трак енсем ял хуçалăх пĕлтерĕшлĕ çĕр 34600 гектар таран тытакан муниципалитетсем хушшинче пĕрремĕш вырăн йышăннă, Диплома, укçан премие тивĕçнĕ.
Тĕл пулăва пĕтĕмлетнĕ май, паха опыта тишкерни икĕ еншĕн те усăллă пулнине палăртнă.