Публикации » Вун пиллĕкмĕш лауреат — Г. Егорова

28 января 2021 г.

 Янкасри Николай Ершов сăвăç-çыравçă Трак тăрăхĕнче хăй ячĕллĕ литература конкурсне йĕркелесе ирттересси ырă пулăм пулса тăчĕ ĕнтĕ. “Ял пурнăçĕ” хаçатра 2020 çулта пичетленнĕ чи лайăх статьясемшĕн вара Николай Гаврилович асăннă премине район хаçачĕн хастар общество корреспондентне — Кỹлхĕрри Карай ялĕнчи Галина Ивановна Егоровăна пама йышăнчĕ. Хĕрỹ чĕреллĕ автора çак кунсенче райхаçат редакцийĕнче чысларĕç. Хăй кăштах чирленĕрен Н. Ершов ку чыслава ирттерме пичет ĕçĕн ветеранне В. Данилова шанчĕ. Çак йĕркесен авторĕ вара Галина Ивановнăна лауреат Дипломне тата укçан премине савăнăçлă лару-тăрура пачĕ. Г.И. Егорова 1960 çулхи пуш уйăхĕн 5-мĕшĕнче хамăр районти Кỹлхĕрри ялĕнчи хресчен çемйинче çуралнă. 1968-1977 çулсенче Карайри вăтам шкулта вĕреннĕ. 1978 çулта Орел облаçĕнчи Мценск хулинчи 10-мĕш профтехучилищĕре пĕлỹ илнĕ хыççăн пĕр тапхăр Шупашкарти тракторсем тăвакан заводра вăй хунă. 1979-1983 çулсенче Шупашкар районĕнчи больницăра секретарь-машинисткăра, унтан “Паха тĕрĕ” фабрикăри раскрой участокĕнче тăрăшнă. 1993 çултан предприниматель ĕçне кỹлĕннĕ. 2012 çултанпа Карай ял тăрăхĕн çарпа учет сĕтелĕн ĕçченĕнче тимленĕ, халĕ Çырмапуç, Кỹлхĕрри тата Çĕньял Карай ялĕсенче пурăнакансене хаçат-журнал валеçет. Галина Ивановнăна ку тăрăхри ветерансен канашĕн председательне суйланă. Вăл — “Карай Ен” тата Çĕрпỹ районĕнчи “Шурвар” фольклор ушкăнĕсен членĕ, тĕрлĕ фестивальсемпе конкурссене, концертсемпе смотрсене хутшăнать. Дипломсемпе Тав хучĕсене тивĕçнĕ. Районти “Ял пурнăçĕ” хаçатпа тачă çыхăну тытать. В. Данилов.