28 января 2021 г.
Район администрацийĕн пуçлăхĕ 2021 çулхи январън 18-мĕшĕнче 10 №-лĕ “Районта оборонăпа массăллă тата спорт ĕçĕн уйăхлăхне ирттересси çинчен” йышăну кăларнă. Унăн положенине тата комплекслă планне çирĕплетнĕ. Йăлана кĕнĕ уйăхлăх кăрлачăн 23 - нарăсăн 23-мĕшĕсенче иртет. Унăн тĕллевĕ — яш-кĕрĕме çарпа патриотла воспитани парасси, призыври тата призывчченхи çамрăксене çар службине кайма хатĕрлесси. Кăçал уйăхлăха Сăр тата Хусан хỹтĕлев чиккисен строителĕсен ĕç паттăрлăхне халалланă. Уйăхлăх вăхăтĕнче вĕренỹ организацийĕсенче Паттăрлăх урокĕсем, çавра сĕтелсем, наукăпа практика конференцийĕсем ирттереççĕ, Тăван çĕршывăн Аслă вăрçин, тыл ветеранĕсемпе, туллă-сăртлă Афганистан Республикинчи, Кавказ тăрăхĕнчи юнлă тытăçусене хутшăннисемпе, РФ Хĕç-пăшаллă Вăйсен офицерĕсемпе, запасри çар çыннисемпе тĕл пулусем йĕркелеççĕ. Çавăн пекех çак тапхăрта Çар Мухтавĕн музейĕсенче онлайн-экскурсисем, ỹкерчĕксен куравĕсемпе презентацисем, сăн ỹкерчĕксен выставкисем иртеççĕ. Кăçал уйăхлăхри мероприятисене санитарипе эпидемиологи лару-тăрăвне шута илсе йĕркелеççĕ.