21 января 2021 г.
Иртнĕ шăматкун, кăрлач уйăхĕн 16-мĕшĕнче, республикăра Раççей тата чăваш пичечĕн кунĕсене савăнăçлă лару-тăрура паллă турĕç. Çав ятпа И.Н. Ульянов ячĕллĕ Чăваш патшалăх университечĕн Культура керменĕ журналистсене, пичет ĕçĕн ветеранĕсене, полиграфистсене, кĕнеке-хаçат вулама юратакансене пухрĕ. Культура керменĕн иккĕмĕш хучĕ вĕллене аса илтерчĕ мана: шавлать, сĕрлет вăл. Район-хула хаçачĕсен, Чăваш кĕнеке издательствин юлашки вăхăтра тухнă кĕнекисен куравĕсем ĕçлеççĕ. Чи пултаруллă хаçатсен редакцийĕсем РФ Патшалăх Думин депутачĕсен — А. Аршинова, Н. Малов, Л. Черкесов аллинчен парнесем туянчĕç. Вăхăт 11 сехет. Уява ертсе пыракан О. Авельевпа (ЧПТРК) К. Алексина (“Тăван радио”) праçник пуçланни çинчен пĕлтереççĕ. Пичет уявне Чăваш Ен Пуçлăхĕ О. Николаев пырса кĕрет. Пурте ура çине тăраççĕ, алă çупаççĕ. Сцена çинче “21” число куç умне ỹкет. Кăçал Чăваш Еншĕн вăл пĕлтерĕшлĕ пулăм иккен: “21 ĕмĕр”, “21 çул”, “21-мĕш регион”, “республикăра 21 муниципаллă район” тата “21 тĕллев”. Сцена çине О. Николаев улăхать. “Паян пирĕн сирĕнпе пысăк уяв — Раççей тата чăваш пичечĕн кунĕ, — терĕ Олег Алексеевич. — Халĕ республикăра массăллă информаци, медиа-интернет кăларăмсем 170-е яхăн. Вĕсем вăхăт таппипе тан пыма, вулакан-куракана тĕрĕс те çĕнĕ информацисемпе туллин тивĕçтерме тăрăшаççĕ. Анчах витĕмлĕ критика пирки те манма кирлĕ мар. Вăл ĕçре пире витĕм тата пулăшу кỹрет çеç. Журналистика тăваттăмĕш влаç пулнă, çаплах пулĕ те. Унăн пĕлтерĕшĕ паян кун та чакмасть. Чăваш журналистики хăй тытăмĕнче малашне те тивĕçлĕ вырăн йышăнасса шанса тăратăп. Кăçал республикăри пичет органĕсенчен чылайăшĕ çавра датисене паллă тăвать. Тепĕр хут уяв ячĕпе”. Вăл калем ăстисен пĕр ушкăнне республикăн хисеплĕ ячĕсене панине пĕлтерекен свидетельствăсем, “Чăваш автономине йĕркеленĕренпе 100 çул” юбилей медалĕ пачĕ. Уява пухăннисене ЧР цифра аталанăвĕпе информаци политикин тата массăллă коммуникацисен министрĕн тивĕçĕсене пурнăçлакан К.А. Майнина саламларĕ, умри тĕллевсемпе паллаштарчĕ. Кристина Андреевна журналистсемпе полиграфистсен пĕр ушкăнне çак тытăмăн Хисеп хучĕсемпе, “Чăваш автономине йĕркеленĕренпе 100 çул” юбилей медалĕпе чысларĕ. Праçникре “Чăваш Республикинчи журналистсен Пĕрлĕхĕ” регионти общество организацийĕн пуçлăхĕ В. Комиссаров тухса калаçрĕ. Валерий Петрович республикăри журналистсен премийĕсене парас тĕлĕшпе ĕçленĕ комиссин йышăнăвĕпе паллаштарчĕ. Иртнĕ çул пултарулăх ĕçĕнче палăрнăшăн ЧР журналистсен Çемен Элкер ячĕллĕ премие Владислав Николаев (“Республика” хаçат), Н. Никольский ячĕллĕ премие Сегей Журавлев фотокорреспондент (“Хыпар”), Леонид Ильин ячĕллĕ премие Андрей Михайловпа (“Хыпар”) Арсений Вишняков (“Канаш ен”), РФ Журналистсен союзĕн Хисеп грамотине Е, Атамановăпа Ю. Гурьянов тивĕçрĕç. Епле уяв-ха вăл юрă-ташăсăр? Праçнике килнисене республикăри пултарулăх ушкăнĕсем саламларĕç. Икĕ сехете пынă савăк мероприятирен тулли кăмăлпа саланчĕç вырăнсене калем ăстисем. Ю. Борисов.