Публикации » Райхаçат тусĕсем тавра

14 января 2021 г.

Ял урамĕпе утатăп. Первомайски урамĕпе çăмăллăн ярса пусатăп. Манăн черетпе пĕр киле çитмелле. “Ял пурнăçĕ” хаçатăн тусĕ пурăнать унта. Профессийĕпе медицина сестри вăл. Çул çинче çăмăллăн васкакан хĕрарăмпа курнăçрăм. — Район хыпарçине валеçетĕп-ха. Сирĕн ку тăрăхра Анатолийпе Ве-ниамин Прокопьевсем “Ял пурнăçне” çырăнни паллă. Вĕсен мăшăрĕсем — Мальвина Петровнăпа Зинаида Ни-колаевна та мăшăрĕсем пекех юратса вулаççĕ район хыпарçине, — сăмах хушрăм лавккана çул тытаканскере. — Эсир “Ял пурнăçне” вулатăр-и? — Паллах... Эпĕ çывăх “тус-юлташа” район центрĕнче илсе тăратăп. Хам райбольницăра тăрăшатăп та... — йăл кулăпа калаçрĕ Света Уварова. — Вулатăп “Ял пурнăçне”. Ялти клуб çывăхĕнче вулавăш ветеранĕ Зинаида Данилова тĕл пулчĕ. Сăмах-юмах çырăнтару, тĕрĕссипе, район хаçачĕ çине куçрĕ. Зинаида Ивановна райцентрти пасарта суту-илỹ ĕçне пурнăçласа пынă май, хăй палăртнă кунсенче килте хатĕрленĕ таварсемпе унта суту-илỹ тума çỹрет. Вăл та район хыпарçине хăйĕн ĕç вырăнĕнчех кĕтсе илет. Библиотека ĕçĕн ветеранĕ район хаçатне Вăкăр çулталăкĕнче епле курассине каларĕ... “Вуламалли чăн-чăн хаçат пултăр”, — терĕ.

Г. Тусли.