14 января 2021 г.
Çĕнĕ çул умĕн, раштав уйăхĕн 26-27-мĕшĕсенче, Çĕнĕ Шупашкарта кикбоксинг енĕпе çулленех йĕркелесе ирттерекен “Александр Поветкин Кубокĕ” ятпа республика шайĕнчи ăмăрту иртрĕ. Асăннă ăмăртура яланхиллех Трак ен каччисем те палăрчĕç. Вĕсем тупăшусенче пысăк ăсталăх тата çĕнтерỹ патне кăмăл çирĕплĕхĕ кăтартрĕç. Финалти вăйăра Вениамин Михеев Шупашкарти пĕр паллă кĕрешỹçĕне выляса ячĕ, иккĕмĕш вырăн йышăнчĕ. Александр Иванов вара “ШАГ” спортклубăн опытлă та вăйлă спортсменне çĕнтерчĕ, ылтăн медаль çĕнсе илчĕ. Хăйĕн çĕнтерĕвне пирĕн спортсмен Павлик Серейкина (@pavlik_sma_help) халаллать. Ăна паян питех те васкавлă пулăшу кирлĕ. Эсир те унăн страницине кĕрсе пăхăр, тен, çакăн хыççăн сирĕн те Павлика пулăшу кỹрес шухăш çуралать. Пурне те Çĕнĕ çул ячĕпе саламлатăп, уйрăмах спортпа туслă ачасене çирĕп сывлăхпа ăнăçу сунатăп. Лайăх вĕренĕр, спортпа туслă пулăр. Кăштах Чăваш Енти кикбоксинг спорчĕ пирки Вăл спортăн ытти енĕ пекех туллин аталанса пырать. Паян ЧР кикбоксинг ассоциацийĕн президенчĕ — А.И. Соловьев. Вăл 1973 çулхи сентябрĕн 14-мĕшĕнче Шупашкарта çуралнă. Раççейĕн боксер-профессионалĕ. Ăмăртусене чи йывăр виçе категорийĕпе хутшăнать. Профес-сионал боксĕ енĕпе Никама пăхăнман çĕршывсен (СНГ) тата славян çĕршывĕсен (WBС версипе) чемпионĕ, профессионал боксĕн (1) IBFăн интернационал чемпионĕ, кикбоксинг енĕпе (2) сакăр хут тĕнче чемпионĕ (версийĕсем: WAKO, IAKSA, WPKA, WKA, WFC, ICO, WPK), кикбоксинг енĕпе Европăн пилĕк хут чемпионĕ.
А. Тимофеев.