14 января 2021 г.
Иртнĕ çул вĕçĕнче район администрацийĕн çуртĕнче ял хуçалăхĕнчи 2020 çулхи ĕç-хĕлĕн малтанхи кăтартăвĕсене пĕтĕмлетрĕç. Çавна май пысăк канашлу иртрĕ. Унăн ĕçне ЧР Министрсен Кабинечĕн Председателĕн çумĕ-ял хуçалăх министрĕ С. Артамонов, район администрацийĕн пуçлăхĕ А. Кузнецов, ЧР Патшалăх Канашĕн депутачĕ Ю. Попов, Трак енри ял хуçалăх предприятийĕсен ертỹçисем хутшăнчĕç. Хăйĕн сăмахĕнче С. Артамонов канашлăва хутшăннисене республикăн ял хуçалăх отраслĕнчи лару-тăрупа паллаштарчĕ. Чăваш Енри ял хуçалăх производствинче ырă улшăну палăрать. 2016 çултан ял хуçалăхне тата ял тăрăхĕсене аталантарма патшалăх пулăшăвĕ парасси 1,6 хут ỹснĕ е 1,3 млрд тенкĕпе танлашнă. Çитес çул та хальхи аталану енĕсемпе малалла ĕçлеме пăхаççĕ. 2021 çулта та ку енĕпе укçа-тенкĕпе пулăшасси чакмасть. Çулталăкăн малтанхи кăтартăвĕсене пĕтĕмлетсе, район администрацийĕн пуçлăхĕ А. Кузнецов Трак енри агропромышленность комплексĕн ĕçченĕсемпе ертỹçисене лайăх кăтартусемшĕн, аван ĕçленĕшĕн тав турĕ. Ял хуçалăхĕнче йĕркеленĕ экономика ăмăртăвĕн пĕтĕмлетĕвĕпе килĕшỹллĕн, пирĕн район ял хуçалăх пĕлтерĕшлĕ çĕр 34600 гектар таран тытакан муниципалитетсем хушшинче пĕрремĕш вырăн йышăннă, Диплома, укçан премие тивĕçнĕ. 2020 çулта районти ял хуçалăх предприятийĕсем тата хресченпе фермер хуçалăхĕсем 15254 гектар çинчен пĕрчĕллĕ тата пăрçа йышши культурăсем пухса кĕртнĕ. Вăтам тухăç 37,1 центнерпа (56610 тонна тĕш тырă прихутланă) танлашнă. Ку малтанхи çулхинчен 15930 тонна нумайрах. Пĕлтĕрхи тухăç районшăн рекордлă пулнă. Иртнĕ çулхи 11 уйăхра мĕн пур категориллĕ хуçалăхсенче 17389 тонна сĕт туса илнĕ (малтанхи çулхинчен 103 процент), вăл шутран ял хуçалăх предприятийĕсемпе хресченпе фермер хуçалăхĕсенче 7219 тонна (2019 çулхинчен 496 тонна нумайрах). Трак енри ял хуçалăх предприятийĕсемпе ХФХсем иртнĕ çулхи 11 уйăхра 68 единица техника (117068 пин тенкĕлĕх) туяннă. Ку вăл малтанхи çулхинчен 1,7 хут пысăкрах. С. Артамоновпа А. Кузнецов ял хуçалăх производствинче малта пыракансен, вĕсен ветеранĕсен пĕр ушкăнне "Чăваш автономи облаçне йĕркеленĕренпе 100 çул" медальпе, РФ Ял хуçалăх министерствин Тав çырăвĕсемпе, ЧР Ял хуçалăх министерствин Хисеп грамотисемпе чысларĕç. Район депутачĕсен Пухăвĕн йышăнăвĕпе Трак ен пурнăçне активлă хутшăннăшăн, унăн пур енлĕ аталанăвне çирĕплетме тỹпе хывнăшăн тата районăн авторитетне республикăпа унăн тулашĕнче ỹстерме пулăшу кỹнĕшĕн ЧР Патшалăх Канашĕн депутатне, “Вăрнарти аш-какай комбиначĕ” ООО компанин президентне ЮРИЙ АЛЕКСЕЕВИЧ ПОПОВА “Красноармейски районĕн хисеплĕ гражданинĕ” ят парса чысларĕç. Вăл хăйĕн ĕçне çапла пысăка хурса хакланăшăн район депутачĕсен Пухăвне, район администрацине тав турĕ. Савăнăçлă мероприятие хутшăннисене ЧР культурăн тава тивĕçлĕ ĕçченĕ Н. Никоноров ертсе пыракан халăх музыкин “Хавал” ансамблĕ çепĕç юрăсемпе савăнтарчĕ. С. Самсонов.