25 декабря 2020 г.
Ĕнер, раштав уйăхĕн 24-мĕшĕнче, Чăваш Республикин Пуçлăхĕ О. Николаев республикăри массăллă информаци хатĕрĕсенче ĕçлекен журналистсемпе пресс-конференци ирттерчĕ. Вăл 1,5 сехете яхăн пычĕ. Паян, кăшăл инфекцийĕ алхаснă тапхăрта, асăннă мероприятие онлайн мелĕпе йĕркелерĕç. Журналистсем кустсем çине уйрăлса ĕçлерĕç. Пирĕн корреспондент Ю. Борисов Çĕрпỹ ушкăнĕнче ĕçлерĕ. Чăваш Ен Пуçлăхне О. Николаева журналистсем вун-вун ыйту пачĕç. Вĕсем, тĕпрен илсен, коронавирус инфекцийĕ алхаснă тапхăрта ĕç-хĕле йĕркелесси, ĕç укçи, пенси, чăваш чĕлхине аталантарасси, çул-йĕр, строительство, тирпей-илем, ытти ыйтусем пирки пулчĕç. Вĕсем çине Олег Алексеевич тĕплĕн хуравларĕ.