11 декабря 2020 г.
Иртнĕ ытларикун Трак енре туса хунă мобильлĕ ушкăнсем вирус инфекцийĕ анлăн сарăлса пынă тапхăрта çынсем суту-илỹ объекчĕсенче, вĕренỹ учрежденийĕсенче тата обществăлла транспортра маска, дезинфекци режимне еплерех пăхăнни, хỹтлĕх хатĕрĕсене еплерех усă курнине тĕрĕсленĕ. Вĕсем 24 объектра пулса курнă: суту-илỹн 14 точкинче, 4 вĕренỹ учрежденийĕнче, 3 аптекăра, "Раççей почтин" районти уйрăмĕнче, 2 чарăну павильонĕнче. Рейд вăхăтĕнче Чăваш Ен Пуçлăхĕн 2020 çулхи июнĕн 20-мĕшĕнчи 166 №-лĕ "Чăваш Республикин территорийĕнчи халăха санитарипе эпидемиологи тĕлĕшĕнчен тăнăçлăх туса парас тĕлĕшпе йышăннă мерăсем çинчен" Указне пăснине тупса палăртнă. Ушкăн членĕсем суту-илỹ ĕçченĕсене çынсен ыйтăвĕсене тивĕçтернĕ чухне маска режимне çивĕччĕн пурнăçламалли çинчен асăрхаттарнă, халăх йышлăн пухăннă чухне дистанци режимне пăхăнмалли çинчен каланă, вĕсемпе тĕллевлĕ калаçусем йĕркеленĕ.