04 декабря 2020 г.
Иртнĕ кунсенче районти потребителсен обществин канашĕн сумлă ертỹçи Роза Алексендровна Николаева хăйĕн сумлă юбилейне паллă турĕ, 55 çул тултарчĕ. Мăн Çавал юхан шывĕн хĕрринчи Çĕнĕ Йĕкĕтре çуралнă вăл. Упи шкулне вĕренсе пĕтернĕ. Шкул çулĕсене, ашшĕне, Александр Илларионовича, амăшне, хăйне ăш пиллĕх парнеленĕ Дария Андреевнăна паян кун та питех те ăшшăн аса илет Роза Александровна. Хисеплĕ ватăсем пирĕн хушăмăрта çук ĕнтĕ. Вĕсем 1947 çулта çемье çавăрнă пулнă, 7 ачине кун-çул парнеленĕ. Пурте пурнăçăн аслă çулĕ çине тухнă. Шел, Володя пиччĕшĕ пирĕнтен ĕмĕрлĕхех уйрăлса кайнă. Ытти ывăлĕ-хĕрĕ хăйсен çемйисемпе тĕрлĕ çĕрте тĕпленсе пурăнаççĕ. Вĕсем ашшĕпе амăшĕн таса ятне ĕмĕр-ĕмĕр упраса пурăнма, хăйсене, ачисене, мăнукĕсене ырă та таса чунлă пулма, ял-йышпа, тус-тăванпа яланах ырă кăмăлпа, хастаррăн пурăнма шур сухалсем панă пиле асрах тытаççĕ. Çапла пулмалла та чăн чăвашăн пархатарлăхĕ. Кил хуçи — Александр Илларионович Тăван çĕршывăн Аслă вăрçинче сахал мар хĕн-асап тỹснĕ. Эпĕ раштав уйăхĕн 1-мĕшĕнче хамăр райпо ертỹçипе, ЧР халăха тивĕçтерекен сферăн тава тивĕçлĕ ĕçченĕпе Р. Николаевăпа тĕл пултăм. Роза Александровна шăпах Илларионовсен кĕçĕн хĕрĕ-çке. Вăл çак кун 55 çулхи юбилейне паллă турĕ. — Эпĕ хамăн пурнăçа мĕн ачаран суту-илỹпе çыхăнтарма тĕллев тытнă. Володя пиччен мăшăрĕ Галина Петровна Çĕнĕ Йĕкĕт лавккинче тăрăшатчĕ. Унтан тĕслĕх илнĕ ĕнтĕ. Упи вăтам шкулĕ хыççăн Мускаври потребкоопераци университечĕн Шу-пашкарти филиалĕнчи “Экономика” уйрăмĕнче экономист специальноçне вĕренсе тухрăм, — аса илчĕ иртнĕ пурнăçа Р. Николаева. Алла диплом илнĕ хыççăн хамăр районти райпора аслă экономистра тимлет вăл. Каярах ентешĕм уни-вермагра, обществăлла апатлану предприятийĕнче, районти Перекет банкĕн кредит секторĕн, район адми-нистрацийĕн финанс пайĕн пуçлăхĕнче вăй хурать. Р. Николаева 2013 çулхи çĕртме уйăхĕн 14-мĕшĕнчен хамăр райпо канашĕн председателĕн тивĕçĕсене пурнăçласа пырать. “Красноармейски районĕнчи потребительсен обществи — тĕслĕх, пахалăх тата шанчăклăх” — çак девизпа тăрăшать паян пирĕн райпо коллективĕ. Суту-илỹ ĕçченĕн ĕçĕ питех те курăмлă. — Пирĕн ĕçе тавар туянакан хак парать. Иртнĕ çулхи авăн уйăхĕн 1-мĕшĕнчен Куславкка район территорийĕнче вырнаçнă суту-илỹ точкисене пăхса тăратпăр, — тет Роза Александровна кăмăллăн. — Ĕçĕ чылай, çăмăл мар конкуренци вăй илнĕ чухне. Хам ку тытăмра сахал мар ĕçленĕрен çак ĕçе аван пĕлетĕп. Пархатрлă ĕçшĕн Р. Николаева çĕршыв шайĕнчи чылай наградăна тивĕçнĕ. Р. Николева Анат Кушар каччипе Эдуард Николаевпа 1990 çулхи авăн уйăхĕн 1-мĕшĕнче хут уйăрнă. Кăçал вĕсен çемье чăмăртанăранпа шăпах 30 çул çитрĕ. Маринăпа Виктория хĕрĕсене çитĕнтереççĕ. Вĕсем аслă пĕлỹ илсе хăйсен кăмăлне каякан ĕç тупнă. Роза Александровнăна çак паллă кун ячĕпе саламламалли кăна юлать. Сирĕн пурнăçăн анлă çулĕпе малашне те çутă ĕмĕт-тĕллевсемпе хав-халанса утмалла пултăр. Çывăх çынсен тимлĕхĕпе ăшшийĕ вăй-хал кỹрсе тăтăр, Турă панă кашни кун савăнăç парнелетĕр Сире. Г. Дубров.