04 декабря 2020 г.
“Сывлăхран хакли çук”, “Сывлăх пулсан пуринчен пуян” — тенĕ ваттисем. Тăрăшса вĕренме те, çанна тавăрса ĕçлеме те, юрласа ташлама та, савăнса пурăнма та сывлăх кирлĕ. Юлашки вăхăтра, хăрушă чир-чĕр алхаснă самантра, сывлăх çине тата та тимлĕрех пăхмалла, ăна май килнĕ таран çирĕплетме тăрăшмалла. Усăллă апат çини, çителĕклĕ çывăрни, уçă сывлăшра уçăлса çỹрени, спортпа туслă пулни, кăмăл ырă та савăк пулни — сывă пурнăç йĕркине пăхăнса пурăннине пĕлтерет. Сывлăха сыхлас ыйтупа шкул ачисемпе те час-часах калаçусем, сывлăх сехечĕсем, спорт ăмăртăвĕсем ирттеретпĕр. Акă, Красноармейски шкулĕн 5 “а” класĕнче “Сывлăхлă пулăр!” темăпа спорт вăййисем иртрĕç. Шкулăн спорт залĕнче ачасем икĕ ушкăна (“Ракета” тата “Çăл-тăр” ушкăнсем) пайланса тĕрлĕрен вăйăсенче тупăшрĕç. Вĕренекенсен ỹсĕмне кура суйласа илнĕ хускануллă вăйăсем интереслĕ те савăнăçлă пулчĕç. Ачасене ытларах мечĕкпе усă курса йĕркеленĕ вăйăсем килĕшрĕç. Туслă тупăшура 1 балл ытларах пуçтарса “Ракета” ушкăн çĕнтерчĕ. “Çăлтăр” ушкăнри ачасем вара çĕнтерỹçĕсемпе пĕрле вĕсен çитĕнĕвĕшĕн савăнчĕç. Спорт вăййисене волейбол енĕпе ĕçлекен Альбина Николаевна Люби-мова тренер йĕркелесе пычĕ. Ăна уншăн пысăк тав тăватпăр, сывлăх, телей, ăнăçу, çитĕнỹсем сунатпăр. Ушкăнпа ирттернĕ вă-йăсенче, ăмăртусенче ачасен туслăхĕ çирĕпленет, пĕр-пĕриншĕн кулянма, савăнма, пăшăрханма пултарас туйăмĕ вăйланать, хавхаланас, пĕр-пĕрне пулăшас кăмăлĕ ỹсет.
З. Михайлова.