01 декабря 2020 г.
Тĕнчере коронавирус алхасни массăллă информаци хатĕрĕсене те ура хурать. Апла пулин те пуçне усмаççĕ-ха вĕсенче вăй хуракансем. Журналистсем ку тапхăрта вулакансемпе тытакан çыхăнăва çирĕплетсе пыма çине тăраççĕ, Раççейре, Чăваш Енре тата Трак енре коронавируспа кĕрешесси мĕнле пулса пыни çинчен каласа параççĕ. Çак тĕллевпе вĕсем тĕрлĕ майсемпе мелсем шыраççĕ. Районти “Ял пурнăçĕ” хаçатра ĕçлекенсем, авă, унчченхи ырă йăласене çĕнĕрен ĕçе кĕртме шутларĕç. Вĕсенчен пĕри ĕçтешсемпе тытакан çыхăнăва татах та çирĕплетесси терĕç. Журналистсен пĕр ушкăнĕ, калăпăр, хăй вăхăтĕнче Йĕпреç райо-нĕнчи “Çĕнтерỹшĕн” хаçат редакцийĕнче пулса курнăччĕ, унта вăй хуракансен паха опычĕпе паллашма çула тухнăччĕ. Ĕçтешĕсен лайăх енĕсене хамăр хаçатра ĕçе кĕртме çине тăчĕç вĕсем. Хальхинче вара “Ял пурнăçĕ” хаçат журналисчĕсем Йĕпреçсене хăйсем патне килсе курма йыхрав турĕç. Коронавируса пула йышлăн çула тухаймарĕç вĕсем. Г. Кузнецов корреспондент Александр Быков водительпе пĕрле килме кăмăл тунă. Вĕсене хамăр редакцири çыравçăсемпе пичет ĕçĕн ветеранĕсем кĕтсе илчĕç. Тĕп редактор çумĕ Ю. Борисов хаклă хăнана редакци ĕçĕ-хĕлĕпе туллин паллаштарчĕ, тĕрлĕ йывăрлăх-чăрмава пăхмасăр вулакансемпе тытакан çыхăнăва çирĕп-летес енĕпе пурнăçа кĕр-текен мероприятисемпе тĕллевсем çинчен каласа пачĕ. Кăларăмсемшĕн яваплă М. Романова редактор, ветерансем — Л. Антонов сăвăçпа Раççей журналистсен Пĕр-лĕхĕн членĕ В. Конс-тантинов литературăри хăйсен ĕçĕсем пирки пĕлтерчĕç. Геннадий Васильевич та парăмра юлмарĕ. Вăл — республика журналисти-кинче палăрнă ят. Ветеран пичетре 55 çул вăй хурать. Ăнăçуллă утăмсем тунă-шăн ăна чăваш журналисчĕсен Çемен Элкер ячĕллĕ премийĕпе тата “Чăваш Республикин культурăн тава тивĕçлĕ ĕçченĕ” хисеплĕ ятпа чысланă. Сăмах май, унăн пурнăç çулĕ пирĕн тăрăхпа та çыхăннă. 1967 çулхи ака уйăхĕнчен тытăнса 1972 çулхи авăн уйăхĕччен Г. Кузнецов “Ял пурнăçĕ” хаçатра ял хуçалăх пайĕн заведующийĕ, литсотрудник тата яваплă секретарь пулса тăрăшнă. Ун чухне пирĕн хаçат республикăри конкурссенче пĕр хут кăна мар çĕнтерсе пĕрремĕш степеньлĕ Дипломсене тивĕçнĕ. Çакăнта Геннадий Васильевич тỹпи те сумлă пулнă. Г. Кузнецов Красноармейскисене Йĕпреçсен журналистикăри опычĕ çинчен каласа пачĕ, ыйтусене хуравларĕ, вĕ-сене хăйĕн сăвă кĕнекисене парнелерĕ. Тĕл пулу ăшă кăмăллă лару-тăрура иртрĕ. Икĕ енĕ те çыхăнусене малалла çирĕплетсе пыма калаçса килĕшрĕç.
В. Данилов.