01 декабря 2020 г.
Иртнĕ эрнекун, чỹк уйăхĕн 27-мĕшĕнче, Красноармейски ялĕн тĕп стадионĕнче искусственнăй виткĕчлĕ футбол уйне савăнăçлă лару-тăрура уçрĕç. Ăна ЧР Пуçлăхĕн 2019 çулхи авăн уйăхĕн 26-мĕшĕнчи 118 №-лĕ “Чăваш Республикинче пурăнакан халăхăн пурнăç шайне ỹстерес тĕлĕшпе хушма мерăсем йышăнасси çинчен” Указне пурнăçласа ĕçе кĕртнĕ. Çав кун Красноармейскинче чăн-чăн спорт уявĕ иртрĕ. Ку объекта ĕçе кĕртнĕ май, хам та унта пĕрре çеç мар пулса курнă. Ĕç-хĕле шăрăх çу кунĕсенче пуçларĕç те чỹк уйăхĕн сивĕ кунĕсенче вĕçлерĕç. Строительство ĕçĕсене “Аликовская МСО” ООО компани ĕçченĕсем пурнăçланă. Контракт хакĕ 32 миллион тенкĕне яхăн. Стадионта 64х104 м калăпăшлă искусственнăй виткĕчлĕ футбол уйĕсĕр пуçне çăмăл атлетсем валли чупмалли çулсем, ядро ывăтмалли тата тăршшĕне сикмелли секторсем пур. Спорт уявне килнисене Чăваш Ен Пуçлăхĕ О. Николаев тата хăй ячĕпе ЧР физкультурăпа спорт министрĕ В. Петров саламларĕ. “Трак енре пурăнакансем çак куна, искусственнăй виткĕчлĕ футбол уйне уçасса чăтăмсăррăн кĕтрĕç, — терĕ Василий Владимирович. Çамрăк футболистсемшĕн вăл чăн-чăн парне пулчĕ. Эсир футбол уйне лайăх упрасса шанса тăратăп. Аса илтеретĕп, кунти строительство ĕçĕсене ЧР Пуçлăхĕн халăхăн пурнăç шайне ỹстерес тĕллевпе кăларнă Указне пурнăçласа туса пычĕç. Паян эпĕ район администрацийĕн пуçлăхне А. Кузнецова тав сăмахĕ каласшăн. Шăпах Красноармейскисем кăçал республикăра çакăн йышши футбол уйĕсене ĕçе кĕртес çĕрте ытти муниципалитетсем хушшинче пĕрремĕш пулчĕç. Хăйсен умне лартнă тĕллеве тивĕçлипе пурнăçларĕç. Трак тăрăхĕнче пурăнакансем илемлĕ, паянхи вăхăт ыйтакан футбол уйĕллĕ, стадионлă пулчĕç”. Тата çакна палăртмасăр май çук. Спорт уявĕ умĕн ЧР Физкультурăпа спорт министерствипе пирĕн район администрацийĕ икĕ енлĕ Килĕшỹ çине алă пуснă. Унта малашнехи пĕрлехи ĕç-хĕле палăртнă, çав шутра массăллă спорта аталантарасси, спорт лапамĕсем тăвасси тата вĕсене юсасси. Тепĕр пулăма та асăнмасăр май çук: Трак тăрăхĕнчи футбол вăййине аталантарас енĕпе республикăри футбол енĕпе специализациленнĕ спорт шкулĕ пирĕн районти ачасемпе çамрăксен спорт шкулĕпе (ДЮСШ) килĕ-шĕве алă пуснă. Шупашкар хăни уява пуш алăпа килмен. Вăл вырăнти футболистсене спорт япалисем — çамрăк спортсменсене тренировкăсем ирттерме барьерсем тата футбол мечĕкĕсем парнелерĕ. ЧР Физкультурăпа спорт министерствин Дипломĕсене çаксем тивĕçнĕ: 2019 çулхи пĕтĕмлетỹсем тăрăх ГТО комплексĕн кăтартăвĕсене пурнăçланă чухне тестировани ĕçне аван йĕркеленĕшĕн, республикăри смотр-конкурсра палăрнăшăн районти тестировани центрĕ иккĕмĕш вырăн йышăннă; 2019 çулта Сывлăх тата спорт кунне йĕркелесе аван ирттернĕшĕн “Чи лайăх ял тăрăхĕ” номинацире Красноармейски ял тăрăхĕ иккĕмĕш вырăна тухнă. “Çак питех те чаплă спорт объекчĕ Трак ен çыннисен кăмăлне каясса, вĕсем физкультурăпа спорта кăмăлласса, çапла май Раççейпе Чăваш Енĕн пĕрлештернĕ командисене кĕрессе шанатăп”, — терĕ министр юлашкинчен. Çак вăхăтрах çĕнĕ футбол уйĕнче ЧР Физкультурăпа спорт министерствин тата “Промсвязьбанк” ПАОн регионти “Приволжский” филиалĕн футболисчĕсем юлташла тĕл пулса вылярĕç. Шăпах çак тапхăрта стадиона Чăваш Ен Пуçлăхĕ О. Николаев пырса кĕчĕ. Олег Алексеевич уява килнисене спорт уявĕ ячĕпе ăшшăн саламларĕ, районти ДЮСШăн тренер-преподавательне М. Петрова футбол мечĕкĕсем парнелерĕ. “Кăçал пирĕн команда республика шайĕнчи ăмăртура иккĕмĕш вырăн йышăнчĕ. Çакăн пек аван, хитре, чаплă искусственнăй виткĕчлĕ футбол уйĕнче эпир кирек хăш вăхăтра та, çанталăкра та тренировкăсем ирттерме пултаратпăр. Кун пек чухне кăтартусем те лайăхланĕç”, — терĕ М. Петров. Иккĕмĕш вăйăра асăннă министерствăн спортсменĕсем пирĕн районăн пĕрлештернĕ “Факел” командипе тĕл пулчĕç. ; ; ; Район администрацийĕн ларусен залĕнче ЧР Пуçлăхĕ О. Николаев республикăра спорт объекчĕсем хута ярас ыйтусемпе канашлу ирттерчĕ. Чăваш Енре 2020 çул вĕçленнĕ тĕле искусственнăй виткĕчлĕ вунă футбол уйĕ ĕçе яма пăхнă пулнă. Çак тĕллевпе республика бюджетĕнче 300 миллион ытла тенкĕ пăхса хăварнă. Апла пулин те тĕрлĕ сăлтавсене пула вĕсенчен хăшĕ-пĕри ĕçе кĕреймест кăçал. Канашлура республикăри 2020 çулта ĕçе кăртмелли спорт объекчĕсем пирки физкультурăпа спорт министрĕ В. Петров, Элĕк, Етĕрне, Елчĕк район администрацийĕсен пуçлăхĕсем, подрядчиксем тухса калаçрĕç. В. Петров çакна палăртрĕ: “республикăри адреслă инвестици программипе халĕ 12 объектран иккĕшĕнче çеç ĕçе вĕçленĕ: Красноармейскинчи искусственнăй виткĕчлĕ футбол уйĕнче тата Чăваш Енри кадет корпусĕн регионти шайбăлла выляс енĕпе çĕкленĕ хоккей центрĕнче. Çулталăк вĕçлениччен тата 5 объекта ĕçе кĕртме пăхаççĕ. В. Петров министр кăçал ĕçе кĕреймен объектсене тишкерсе тухрĕ. Канашлура ЧР Строительство, архитектура тата пурăнмалли çурт-йĕрпе коммуналлă хуçалăх министрĕн çумĕ А. Башлаев сăмах илчĕ. Юлашкинчен ЧР Пуçлăхĕ О. Николев тухса калаçрĕ. Спорт объекчĕсенче ĕçлекен кашни подрядлă организацин ĕç-хĕлне тивĕçлипе хак памалла, çитес çул пирĕн объектсене ĕçе кĕртнĕ чухне хальхи пек йывăрлăхсем сиксе ан тухчăр, — терĕ Олег Алексеевич. — Çакăнпа Пĕрлехи заказчик служби çине таянса ĕçлемелле”. Чăваш Ен Пуçлăхĕ О. Николаев Красноармейскисен ĕçĕ-хĕлĕпе кăмăллă пулнине палăртрĕ. Ю. Борисов.