27 ноября 2020 г.
Кĕçĕн Шетмĕри кану центрĕ çумĕнчи “Романтики” халăх театрĕ Н. Аников çырнă (вырăсларан А. Большаков куçарнă) “Салтак арăмĕ” (режиссерĕ А. Бажбенова) пьесăна сцена çине кăларчĕ. Вырăнти артистсем куракана хаяр вăрçă вăхăтĕнчи мĕн пур йывăрлăха, ирсĕр тăшмана çĕнтерсе малашне мĕнле пурăнмаллине витĕмлĕн кăтартса пама пултарчĕç. Вăй питти арçынсем фронтра, яла вара ватăсемпе хĕрарăмсем юлнă, вĕсен суха тумалла, тырă акса ăна пухса кĕртмелле, выльăх-чĕрлĕхне пăхмалла — хăв çине яваплăх илсе пур ĕçе те вăхăтра пурнăçламалла. “Пурте фронт валли, Çĕнтерỹ валли” девизпа вăй хунă. Кашни килех виçĕ кĕтеслĕ çырусем, тепĕр чухне мăшăрĕ-ывăлĕ паттăрсен вилĕмĕпе вилнĕ е хыпарсăр çухални çинчен хурлăхлă хыпарсем килнĕ. Мĕн чухлĕ хуйхă, куççуль! Мĕншĕн? Халăх театрĕн артисчĕ-сем рольсене çав тери ăста вылярĕç, куракансен чĕрисене хускатрĕç. Вĕсем — А. Бажбенова, В. Петрова, А. Сергеева, Н. Егорова, Л. Козлова, З. Егорова, М. Козлова, И. Козлова. Куракансем вĕсене алă çупса саламларĕç. Спектакль хыççăн ял тăрăхĕн пуçлăхĕ Г. Ефимова ял çыннисен ячĕпе артистсене тав сăмахĕ каларĕ, пултарулăх ĕçĕнче ăнăçусем сунчĕ. Галина Григорьевнăн та куçĕсем шывланчĕç. Унăн ашшĕн тăванĕсем паянхи çутă пурнăçшăн ирсĕр тăшманпа çапăçнă. “Нива” хуçалăхăн профком председателĕ Н. Козлова Аннесен кунĕ ячĕпе пурне те ăшшăн саламларĕ, артистсене парнесем парса хавхалантарчĕ. В. Петрова.