27 ноября 2020 г.
Пикшик ял тăрăхĕн пуçлăхĕ В. Фомин пуçарăвĕпе Пикшик ялĕн çăви çинче тирпей-илем кĕртес енĕпе субботник иртрĕ. Ку масар çине Кỹлçырма, Уйриçурт, Шăпăрлăвар, Ыхракасси, Пикшикпе Çĕньял ялĕсенче пурăннă, пирĕнтен уйрăлнă çынсене юлашки çула ăсатаççĕ. Палăртнă кун çăва çинче хĕрỹ ĕç пуçланчĕ. Çăва картишĕнче ỹссе ларнă йывăçсене П. Емельянов, Ю. Фомин (Ямайкасси ялĕпе суйланнă депутат), В. Иванов бензопăчкăпа касса тăчĕç. Касса йăвантарнă йывăçсене Р. Комаров тытса пыракан МТЗ-80 урапаллă трактор çине А. Димитриев, В. Спиридонов, В. Захаров, В. Игнатьев, А. Андреев, Ф. Григорьев, А. Михайлов тиесе тăчĕç. Вĕсен хушшинче 80 çула кайнă, тивĕçлĕ канăва тухичченех “Большевик” хуçалăхра урапаллă трактор рульне алăран вĕçертмен Г. Прохоров та çамрăк арçынсемпе танах ĕçлерĕ. Пурĕ çав кун 25-е яхăн çын масар çинче тимлерĕ. Ĕç вĕçленнĕ хыççăн ял тăрăхĕн пуçлăхĕ В. Фомин пурне те тав турĕ, çирĕп сывлăх сунчĕ.
Л. Соловьев.