20 ноября 2020 г.
Чăваш автономине туса хунăранпа 100, Аслă Çĕнтерỹ тунăранпа 75 çул çитнине тата Пĕтĕм тĕнчери ял хĕрарăмĕсен кунне халалласа Чăваш наци конгресĕ регионсем хушшинче “Хĕрарăм, сан умăнта таятăп пуçăма” конкурс йĕркелесе ирттерчĕ. Çав тупăшăва хастар хутшăннă чи пултаруллă хĕрарăмсене вара чỹк уйăхĕн 14-мĕшĕнче Шупашкарти Çамрăксен театрĕнче чаплăн чысларĕç. Конкурса пĕтĕмлетсе, “Хĕрарăм, сан умăнта таятăп пуçăма” конкурс пысăк пĕлтерĕшлĕ уяв пулнине, ялти чăваш хĕрарăмĕсем пурнăçпа тан утнине, тăван ха-лăхăмăрăн пуянлăхне — капăр çи-пуçне, ырă йă-ли-йĕркине, илемлĕ юрри-ташшине упраса пурăннине, чăваш апат-çимĕçне ăста хатĕрлеме пултарнине, илемлĕ те пуян чĕлхемĕре юратнине тата çемьери хутшăнусене çирĕплетсе, çемье ăшшине упраса пурăннине кăтартса панине палăртрĕç. Конкурса хутшăннă хĕрарăмсен пултарулăхĕпе ăсталăхне сумлă жюри хакланă. Вĕсем пĕр шухăшлă пулса çĕнтерỹçĕсене тивĕçлипе палăртнă. Пĕрремĕш вырăна тухса “Чăваш ялĕн илемĕ — 2020” ята Комсомольски районĕнчи Татьяна Васильевна Макарова илнĕ. Иккĕмĕш вырăна “Пултарулăх çăлкуçĕ” номинацире иккĕн тухнă: Красноармейски районĕнчи Антонина Николаевна Никонорова тата Хĕрлĕ Чутай районĕнчи Людмила Евгеньевна Яковлева. Виççĕмĕш вырăна — “Ылтăн алă” номинацире — Канаш районĕнчи Галина Васильевна Харитонова çĕнсе илнĕ. Маттур чăваш хĕрарăмĕсене конкурсра çĕнтернĕ ятпа ЧНК президенчĕ Николай Федорович Угаслов саламларĕ. Дипломсемпе парнесем парса чысларĕ. Антонина Никоноровăна эпир ăшшăн саламлатпăр, малашне те иксĕлми пултарулăх, çирĕп вăй-хал, хаваслă кăмăл, тулли телей, пысăк çи-тĕнỹсем, кулленхи ăнăçусем сунатпăр. Район администрацине Трак енĕн пултаруллă çыннисене хавхалантарса тăнăшăн, са-вăнăçа пĕрле пайлама пултарнăшăн, тĕп хуламăра пĕтĕмлетỹ-чыслав уявне кайма транспорт уйăрса панăшăн тав тăватпăр.
З. Михайлова