20 ноября 2020 г.
Тулта хура кĕркуннен юлашки кунĕсем хуçаланаççĕ. Трак енри ял хуçалăх предприятийĕсемпе хресченпе фермер хуçалăхĕсенче уй-хир ĕçĕсем вĕçленнĕ ĕнтĕ. Çавна май кăкарса е çакса ĕçлемелли машинăсенчен чылайăшне ятарлă вырăнсене упрама лартма вăхăт. Çакна шута илсе район администрацийĕн пуçлăхĕ ятарлă йышăну кăларнă, вырăнсенче ку ĕçе еплерех йĕркеленине тĕрĕслеме комисси туса хунă. Иртнĕ юнкун çав комиссипе эпир черетлĕ тĕрĕслеве тухрăмăр та. Çак йышра комисси членĕсем — Гостехнадзорăн районти уйрăмĕн ертỹçи Ю. Иванов, район администрацийĕн ял хуçалăх тата агропромышленность комплексĕн организацийĕсемпе çыхăну тытакан секторĕн ертсе пыракан специалисчĕсем В. Арсентьевăпа И. Федотова тата çак йĕркесен авторĕ, вăлах комисси членĕ Ю. Борисов пулчĕç. — Сезон вĕçленсен ял хуçалăх техникине ятарлă вырăнсене упрама лартассипе ĕнер-паян ĕçлеместпĕр. Ку ĕлĕкрен пыракан йăла, — терĕ Юрий Нестерович. — Çапла тумасан çак тапхăрта вĕсене çумăр, тĕтре, çилпе юр чылай сиен кỹреççĕ. Хĕвел çути сăрăсене, резинăпа пиртен тунă пайсене киветет, машинăсем çинче юлнă удобренисемпе ядохимикатсем тимĕр пайсемпе химилле реакцие кĕме пултараççĕ. Çакă вара машина пайĕсене тутăхтарать, часах стройран кăларать. Япăх герметизаци тунă двигательсен цилиндрĕсем тутăхаççĕ. Çавăнпа та хĕл ларичченхи тĕп тĕллев — ял хуçалăх техникине кирлĕ пек упрама лартасси. — Юлашки çулсенче ЧР Пуçлăхĕ О. Николаев çине тăнипе республикăри аграрисене туяннă çĕнĕ техникăшăн 40 процентне каялла тавăрса параççĕ. Çапла май Чăваш енти Ял хуçалăх министерстви пире вырăнсенче çак мелпе туяннă техника мĕнле шайра пулнине уйрăммăн тĕрĕслеме хушнă, — тет калаçăвне малалла тăсса Ю. Иванов. Эпир “Нива” ЯХПКра. Пире ку енĕпе мĕн-мĕн туни пирки унăн пуçлăхĕ Ю. Козлов паллаштарчĕ. ГОСТ машинăсене сарайсемпе лупас айĕнче упрама сĕнет. Кун пек тума май çук пулсан, машинăсене ятарласа хатĕрленĕ площадкăсене лартмалла. Анчах кун пек чухне вĕсене консерваци тумалла, уйрăм пайĕсене упрама склада хумалла. Анчах çакă кунти машинăпа трактор паркĕнче темшĕн сисĕнмерĕ. Пупĕ мĕнле — прихучĕ çапла, теççĕ. Çак сăмах çаврăнăшĕ “Красное Сормово” ОООна çитсен яр уççăн палăрчĕ. Ĕçрен пушаннă мĕн пур техника управра Яманаксен. Обществăн тĕп инженерĕ В. Кузьмин пире парк тăрăх кăтартса çỹрерĕ. Ял хуçалăх машинине лайăх упрани унпа усă курас срока тăснине, ăна техника енчен пăхса тăмалли тата юсамалли тăкаксен калăпăшне чакарнине, техника мĕн чухлĕ шанчăклăрах, вăл çавăн чухлĕ лайăхрах, тухăçлăрах ĕçленине питех те аван ăнланаççĕ кунта. Тĕш тырă пухса кĕртмелли комбайнсене çумăр лекмен, лайăх виткĕчлĕ лапама кĕртсе лартнă. Кăçал тата икĕ “уй-хир карапĕ” туянма палăртнă обществăра. Ĕç çине хутшăннă механизаторсем канура халĕ. Мастерскойĕнче ăшă, çутă, таса. Юсавçăсен бригади ĕçе тытăннă. Мехпарк территорийĕнчех строительсем икĕ хутлă кирпĕч çурт хăпартаççĕ: пĕрремĕш хутĕнче столовăй пулмалла, иккĕмĕшĕнче хуçалăхăн бухгалтерийĕ вырăн йышăнмалла. Комисси членĕсем “ВОЛИТ” ОООна Пикшик тăрăхĕнчи А. Егорова, Э. Иванов, В. Шумилов хресченпе фермер хуçалăхĕсенче пулса ял хуçалăх техникин ĕмĕрне тăсассишĕн еплерех тăрăшнипе интересленчĕç, уйрăм кăлтăксем тупса палăртрĕç.