17 ноября 2020 г.
.jpg "Тимĕр туй ячĕпе саламланă")
Район администрацийĕн ЗАГС пайĕ Упи ял администрацийĕпе пĕрле Янмурçин ялĕнче пурăнакан Дария Васильевнăпа Егор Михайлович Михайловсене “тимĕр” туй ячĕпе саламланă. Янмурçин ялĕн Октябрь 50 çул тултарнă урамĕнче тĕпленнĕ ватăсем. Вĕсем çемье вучахне 1955 çулхи чỹк уйăхĕн 5-мĕшĕнче чĕртнĕ. Унтанпа вăл хĕрỹ ялкăшать, туслă та ĕçчен çемьене куллен ăшăтса тăрать. Тарьепе Якур пирвайхи хут тĕл пулсанах пĕр-пĕрне килĕштернĕ, çемье тĕвĕленĕ. 65 çул пĕрле пурăнаççĕ. Çак тапхăрта темĕн те пулнă пулĕ, анчах çак туслă çемье таса юратăва сыхласа хăварма пултарнă. Михайловсем кун-çулне тăван тăрăхпа çыхăнтарнă, ял хуçалăхĕнче ĕçлесех ватăлнă. Мучипе кинеми тахçанах тивĕçлĕ канура. Апла пулин те кĕрĕк арки йăваласа лармаççĕ çут çанталăк тусĕсем, çу кунĕсенче пахчара тăрмашаççĕ, хăйсем, мăнукĕсем валли пахча çимĕç, тĕрлĕрен çырла, пан улми çитĕнтереççĕ. Йывăрлăхсем умĕнче нихăçан та пуçĕсене усмаççĕ, кашни кунпа савăнса пурăнаççĕ. Юрату, ырă кăмăл тата чăтăмпа тỹсĕмлĕх çемьене нумай-нумай çул хушши сыхласа упрама пулăшни Дарийăпа Егор Михайлов-мăшăрсен тĕслĕхĕнче яр уççăн çирĕплетет. Вĕсем çак çемье ăрăвĕшĕн тĕп шăнăр пулса тăнă: Михайловсем тăватă ача çитĕнтернĕ, сакăр мăнук, кĕçĕн ултă мăнук. Çакă та интереслĕ: паян кунчченех ватăсем пĕр-пĕрне ячĕпе, ашшĕ ячĕпе чĕнеççĕ. Çакă вăл çемьере пĕр-пĕрне хисепленине яр уççăн çирĕплетет. Ватăсем ку таранччен сивĕ сăмах каласа курман. Хăйсен умне сиксе тухакан мĕн пур ыйтусене пĕрле канашласа татса параççĕ. Уяв ячĕпе сĕтел хушшине вĕри те техĕмлĕ чей ĕçме ларнă май юбилярсене район администрацийĕн пуçлăхĕ А. Кузнецов алă пуснă Тав çырăвне тата асăнмалăх парне панă, ватăсене çирĕп сывлăх, канлĕ ватлăх, мĕн пур ыррине суннă. Михайловсем вара хăйсем çине çакăн пек тимлĕх уйăрнăшăн район тата ял администрацийĕсене тав сăмахĕ калаççĕ. Е. Павлова.