17 ноября 2020 г.
Чăваш автономи облаçĕ 100 çул тултарнине палăртса республика Пуçлăхĕ О. Николаев ялсене тирпей-илем кĕртме, ача-пăча тата спорт лапамĕсем вырнаçтарма 100-шер пин тенкĕ укçа уйăрса пама йышăну турĕ. “Уйăрса панă укçана усă куриччен ялти халăхăн шухăш-кăмăлне шута илтĕмĕр. Унпа Çеçмерпе Кỹлçырма ялĕсенче урамсене электроçутăпа тивĕçтернĕ. Уйриçурт, Шăпăрлăвар, Ыхракассипе Вăрманкас ялĕсем тавра карта тытнă çĕрте усă курнă”, — çирĕплетет Пикшик ял тăрăхĕн пуçлăхĕ В. Фомин. Чỹк уйăхĕн пуçламă-шĕнче Пикшик ялĕнче пурăнакансем ача-пăчан спорт лапамĕ валли унăн вырăнне тирпейлерĕç: çитĕнсе çитнĕ йывăçсене касрĕç, çỹп-çап пуçтарчĕç. Олегпа Ангелина Сидоровсем, Лидăпа Володя Ивановсем, Степанпа Галя Степановсем, Р. Шемякина, И. Ильина, Пикшик ялĕнчен суйланнă Н. Васильева депутат — пурĕ 15 çын субботникра вăй хучĕ. Тирпейлесе тасатнă лапамра “Экономика” ООО (ертỹçи С. Воробьев) чуччу, турниксем, баскетболла вылямалли щитсем... вырнаçтарчĕç. Çак кунах Çĕньялпа Ямайкасси ялĕсенче те ачасем валли спорт лапамĕсем ăсталарĕç. Л. Соловьев.