13 ноября 2020 г.
Чăваш Республикин Цифра аталанăвĕпе информаци политикин тата массăллă коммуникацисен министерстви çулсерен йĕркелекен ача-пăча тата шкул çулĕсенчи яш-кĕрĕм валли тăван чĕлхепе çырнă ал çăрăвĕсен конкурсĕн 2020 çулхи кăтартăвĕсене пĕтĕмлетнĕ. Асăннă конкурс çĕнтерỹçисене хавхалантарасси çинчен ЧР Министрсен Кабинечĕн Председателĕ О. Николаев йышăну кăларнă. Творчество ăмăртăвĕ 9-мĕш хут иртнĕ. Тупăшу чăваш чĕлхипе паянхи вăхăт ыйтакан актуаллă ыйтусемпе пахалăхлă ача-пăча произведенийĕсем хатĕрлесси çинчен калать. Кăçал хаклава 12 авторăн 14 ал çырăвĕ килнĕ. Çĕнтерỹçĕсене конкурс комиссийĕ палăртнă. Ун йышне влаç органĕсен тата общество организацийĕсен çыннисем, çыравçăсем, журналистсем кĕнĕ. 5 уйăх хушши вĕсем творчество ĕçĕсемпе паллашнă, произведенисен чĕлхине, литература стильне, композицине, çавăн пекех вĕсен вĕрентỹ, воспитани, ăс-хакăлпа шухăш-кăмăл, ытти енсене еплерех çутатнине тишкернĕ. Конкурсăн приз фончĕ 200 пин тенкĕпе танлашть, ăна виçĕ çĕнтерỹçĕ хушшинче пайлаççĕ. “Шкул çулне çитмен тата шкулăн кĕçĕн ỹсĕмĕнчи ачасем валли чи лайăх произведени” Юрий Сементерĕн “Параппанлă Митраппан” кĕнекен ал çырăвĕ пулса тăнă. Автор 50 пин тенке тивĕçет. Ольга Куликовăн — Улькка Элменĕн “Кушак” кĕнекен ал çырăвĕ “Шкулăн вăтам çулĕсенчи ачасем валли çырнă чи лайăх произведени” номинацинче çĕнтернĕ. “Шкулăн аслă çулĕсенчи ача-сем валли çырнă чи лайăх произведени” номинацийĕнче жюри Владислав Николаевăн “Кăшăлвирус” кĕнекен ал çырăвĕ çĕнтернĕ тесе пĕлтернĕ. Икĕ авторĕ те 75 пин тенкĕ тивĕçет. Конкурсра çĕнтернĕ ал çырăвĕсем 2021 çулта вулакан патне çитеççĕ.