Публикации » Автоçул тата ача-пăча лапамĕ ĕçе кĕчĕ

10 ноября 2020 г.

 Иртнĕ кĕçнерникун Мăн Шетмĕ ял тăрăхне кĕрекен Йĕпрем ялĕнче 1 км тăршшĕ (сарлакăшĕ 3 м) автоçула уçнă ятпа савăнăçлă мероприяти пулса иртрĕ. Унта Йĕпрем ялĕн çыннисем, ял тата район администрацийĕсен пуçлăхĕсем Г. Ивановăпа А. Кузнецов хутшăнчĕç. Йĕпремсемшĕн асăннă çула хута яни пысăк савăнăç, халĕ яла автомашинăпа кирек епле çанталăкра та кĕрсе тухма пулать. Асăннă çула ял çыннисен пуçарăвĕпе тунă. Александр Николаевич ăна ĕçе кĕртни çул-йĕр хăрушсăрлăхĕн ыйтă-вĕсене татса пама май килни çинчен каланă, ку ял çыннисене хăтлăх та парнелет. Ял тăрăхĕн пуçлăхĕ Г. Иванова ялти чи активлă çынсене Тав хучĕсем парса чысланă. Ун хыççăн пурте пĕрле ача-пăча лапамĕ уçма хутшăннă. Ăна Чăваш автономине йĕркеленĕренпе пĕр ĕмĕр çитнине халалласа республикăри ялсене уйăрса панă 100-шер пин тенкĕ укçа шучĕпе çĕклесе лартнă. 2021 çулта Йĕпремре пуçару бюджечĕн проекчĕпе çĕнĕ клуб çĕклесе лартма пăхаççĕ.